Марий Эл вуйлатыше Юрий Зайцев Оршанке районыш миен.
Тушто тудо Нужавлак ялысе тӱвыра пӧртыштӧ лийын.
Тиде учрежденийым «Тӱвыра» нацпроект дене келшышын капитально олмыктеныт: леведышым, окнам, инженер коммуникацийым вашталтеныт, кӧргыштат да тӱжвалнат отделкым ыштеныт. Тыгак котельныйым, оралтыш пурымо верым ачаленыт, сценыш вес чаршам сакеныт, зрительный залыш у креслым налыныт.
Юрий Зайцев олмыктымо изи залым, книгагудым, актовый залым ончен лектын, районысо тӱвыра пашаеҥ-влак дене вашлийын. Регион вуйлатышын палемдымыж почеш, «Тӱвыра» нацпроектлан кӧра ялысе тӱвыра пӧрт, йоча сымыктыш школ-влакым ачалыме, автоклублам налме, модельный книгагудо-влакым ыштыме. Тыгак республик вуйлатыше Россий президент Владимир Путинын увертарыме у нацпроект-влак нерген ойлен.
Ты районышто илыше-влак регион вуйлатышылан тӱвыра сферылан тӱткышым ойырымыжлан да корным олмыктымылан тауштеныт.
Марий Эл вуйлатыше Шулко тӱвыра пӧртыштат лийын. Тудым ачалаш кӱлеш. Тиде – ты илемыште улыжат ик административный зданий. Тушто верысе администраций, Российын почтыжо, МФЦ, книгагудо, спортзал верланеныт. Тудым «Тӱвыра» нацпроект почеш капитально олмыкташ йодмашым тений пуаш палемдалтеш. Тидлан проект-смете документаций ышталтын.
Пытартышлан Марий Эл вуйлатыше паша дене миен коштмыжым иктешлыше совещанийым эртарен. Тушто погынышо-влак дене Оршанкыште Ӧрша эҥерыште гидроузелым умбакыже олмыкташ, Марково ялыште канализаций сетьым, очистной сооруженийым уэмден тӧрлаташ, Шулко тӱвыра пӧртын леведышыжым ачалаш кӱлмӧ да икмыняр моло йодышым каҥашеныт.
Марий Эл вуйлатышын пресс-службыжын уверже негызеш Л.Камалетдинова ямдылен
