Кумшо гана
8 Март пайрем вашеш кажне ийын «Саскавий» марий ӱдырамаш ушем уш-акылым тергыме «Мунло» интеллектуал марафоным эртара. Теният тыгак лие. Да тыге ышташ икымше модмаш годымак мутланен келшыме. Сандене ты гана «Мунло» марафоныш, а тудо Йылмым, литературым да историйым шымлыше В.М.Васильев лӱмеш марий институтын конференц-залыштыже лие, кумылан команде-влак кумшо гана чумыргеныт ыле.
Кодшо ийласе семынак теният, погынышо ӱдырамаш-шамычым шушаш пайремышт дене саламлымыж да мурпӧлекым ыштымыж годым кузе палемдыш чапланыше мурызына Анатолий Зарецких, чынже денак олыкышто сылне чевер пеледыш-влак коклаште улмыла чучын. Молан манаш гын кажне гаяк командын ӱдырамашыже-влак мотор марий тӱр дене сӧрастарыме вургемым чиен толыныт.
«Чумбылат», «Шонанпыл», «Маскасола кундем»…
Команде-влак нерген ойлаш гын, ончылий 7, ӱмаште 6, а тений 10 команде погынен. Нунын кокла гыч визытше кажне ийын ушна. Тиде – Йошкар-Ола гыч «Чечен вараксим-влак», Советский район гыч «Шонанпыл», Параньга район гыч тыгаяк лӱман, Морко район гыч «Чолпан», Кужэҥер район гыч «Чумбылат». А молышт: Йошкар-Ола гыч «Марий туныктышо», Марий Турек район гыч «У вий», У Торъял район гыч «Кӱдыроҥгыр», Шернур район гыч «Шернур», Медведево район гыч «Маскасола кундем» республик кӱкшытан модмашке икымше гана ушненыт. Нуно сеҥыше-влак радамыш ышт логал гынат, начар огыл шинчымашым ончыктышт. Адакшым мероприятий моткоч келшен, сандене вес ийынат уло кумылын толына манын ойлышт.
Саламлымаш
Таҥасымаш тӱҥалме деч ончыч ӱдырамаш-влакым «Саскавий» ушем вуйлатыше Людмила Кошкина шушаш 8 Март пайрем дене саламлыш. Тыгак кажне ийын ты сылне шошо пайрем вашеш пӧръеҥ-влак шокшо деч шокшо мутыштым ойлат. Тений Марий Эл Кугыжаныш Погын председатель Михаил Васютин толын ыле. Тудо сай кумылым тыланыш да пӧлек шотеш тортым кучыктыш.
– Кызыт Ӱярня арня кая да мелнам кочман. Мый мелнам кӱэшт ом мошто, сандене мом кертмем кондышым, – мыскара йӧре каласыш.
Поэтессе Альбертина Иванова, В.М.Васильев лӱмеш МарНИИЯЛИ-н директоржо Людмила Григорьева шушаш пайрем дене саламлышт. Советский район Шуарсола тӱвыра пӧрт вуйлатыше Эдуард Зырин икмыняр мурыж дене кумылнам нӧлтале. Тыгак «Саскавий» ушем вуйлатыше Людмила Кошкинан темлымыж почеш марафон деч ончыч марий ӱдырамаш ушемын гимнжылан шотлалтше «Авамлан» мурым 60 утла еҥ, ӧндалалт шогалын, чылан пырля йоҥгалтарышт.
Модмаш
Кодшо ийласе семынак ты ганат марафон-модмаште кум тур ыле, да кажныштыже 10 йодыш лийын. Чыным ойлаш гын, южо йодышыжлан участник-влаклан ушыштым чотак пудыратылаш перныш. Мутлан, Марий Эл Республикын Олык Ипай лӱмеш кугыжаныш молодежный премийжын лауреатше кокла гыч кӧ икымше ӱдырамаш лийын? Вашмут – М.Шкетан лӱмеш Марий национальный драме театрын артисткыже Галина Николаевна Иванова-Ямаева 1970 ийыште палемдалтын. Але марий талешке Полтышын (Болтушын) пелашыжын лӱмжӧ кузе? Шошма. Тидым те паленда?
Эше иктат ончылтен огыл!
Кодшо ийын палемденам ыле: «Кӧ ӱмашсе «Мунло» республикысе интеллектуал модмаш-марафон нерген возымым лудын гын, тудо сеҥыше командым вигак палыш». Ӧрмаш, но теният лач тыгак каласыман. «Чолпан» команде теният икымше лие да «Саскавий» марий мер региональный ӱдырамаш ушемын куснылшо кубокшо Морко район гыч тольо, вара адак тушкак кайыш.
Кокымшо верыш Параньга район гыч «Шонанпыл» команде лекте. Мут толмашеш, тыгай сеҥымашыш шумаште шкенан пашаеҥнам, корректор Елена Вараксинам, палемден кодыде нигузе огеш лий, шонена. Молан манаш гын але марте ты команде ончыл радамыш логалын огыл ыле. Ӱмаште, мероприятий пытымеке, тудын участникше-влак ойлышт: «Вес ийын Кугу Пумарий школнан ончычсо туныктышыжым, а кызыт тендан дене пашам ыштыше Елена Николаевнам ӱжына. Тудо командыштына лиеш гын, товатат, сеҥена». Тыгак лекте вет.
Кумшо вер дене Кужэҥер район гыч толшо «Чумбылат» команде палемдалте.
Чылаштымат уло кумылын саламлена!
Любовь Камалетдинова
Авторын фотожо
