Ӱдырамаш-влакын тӱнямбал кечышт вашеш, 7 мартыште, Сеҥымашын ХХХ идалыкше лӱмеш тӱвыра полатыште эртаралтше «А ну-ка, ӱдыр-влак» конкурсын финалыштыже Гран-прим Советский посёлкысо йоча сымыктыш школын туныктышыжо Татьяна Галкина сеҥен налын.
Кушеч тӱҥалын?
«А ну-ка, девушки» конкурс икымше гана 1970 ийыште «Время» программе почеш канде экраныш лектын. Тушто СССР-ын эн мотор, чолга да тале, ушан ӱдыржӧ-влак мастарлыкым ончыктеныт. Таҥасыше-влак коклаште медшӱжар, химик, стюардессе, доярке, киндым пыштыше, ткачихе, связист-влак лийыныт. Шоум мурышо да семӱзгарым шоктышо, фольклор да куштышо коллектив-влак сӧрастареныт.
2024 ий 15 февральыште элнан президентше Владимир Путинын Нижний Тагилыште «Уралвагонзаводышто» лиймыж годым ик пашаеҥ, а тудыжо заводышто эртаралтше «А ну-ка, девушки» конкурсышто сеҥышыш лектын, ты конкурсым россий кӱкшытыштӧ эртараш темлен.
Латвизытын лийыныт
Тений тыгай конкурс, элнам вуйлатышын кӱштымыж почеш, Россий мучко эртаралтеш. Республикнан кажне муниципал образованийыштыжат 18-35 ияш ӱдыр, ӱдырамаш-влак таҥасеныт. Эн ойыртемалтше 15 участник финалыште таҥасен.
Эн ончычак вӱдышӧ-влак кажныжым сценыш ӱжыныт да нунын нерген кӱчыкын каласкаленыт. Тыгодым эн мотор тувырыштым чиен лекше ӱдыр-влак сценыште йӱксыла ийыныт.
– Мемнан ончылно эн мотор, эн ушан, эн чолга конкурсант-влак улыт. Тидым ме видеовизиткыдам онченак умылышна, – палемден жюрин председательже, Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов.
«Мый да мыйын профессием» конкурсышто ӱдыр-влак ик паша кечышт кузе эртымым видео гоч але изирак сценкым модын ончыктеныт. А нунышт тӱрлӧ пашам шуктат. Нунын радамыште – педагог-психолог, туныктышо, воспитатель, кевытче, врач, экскурсовод, тренер, тӱвыра пӧртым, ФАП-ым, ял администрацийым вуйлатыше, газет ден завод пашаеҥ-влак лийыныт.
Усталык конкурс нунын могай улмыштым тӱрыснек почын пуыш. Иктышт чоныштлан лишыл мурым йоҥгалтареныт, весышт келшыше сем почеш шкетын але икшывышт, йолташышт дене пырля куштеныт, а кумшышт клоун семын мыскарашт дене куандареныт. Мутлан, Морко район гыч Марина Жолобован «Йылдыр-йылдыр» марий калык мурым моткоч сылнын муралтымыже шочмо кундемнан моторлыкшо да марий улмына дене кугешнаш таратыш. Советский район гыч Татьяна Галкинан «Вороны», Йошкар-Ола гыч Ольга Шамован «Встанем» мурышт тачысе саманыште пырля лияш да геройна-влакым шарнаш кӱлмӧ нерген эше ик гана ушештарышт. Курыкмарий район гыч Елена Гаранинан «Опак Микита» (автор – Никандр Ильяков) роман гыч Кугу Отечественный сар годым орланен да индыралт илыше-влак нерген ужашым лудмыжо логарыш кочо комылям нӧлтыш.
«Россий – мыйын Шочмо элем» конкурсышто шукынжо Кугу Отечественный сарыште тушман ваштареш кредалмаште лӱддымылыкым да чолгалыкым ончыктышо салтак, Совет Ушем Герой лӱмым налше-влакын подвигышт, тылыште сеҥымашым лишемдаш полшышо-влак нерген каласкалышт.
Специальный военный операций шуко ешым ойгандарен. Шочмо элнам тушман деч аралымаште ятыр марий салтак вуйжым пыштен. Шернур район гыч Ольга Элембаеван, Советский район гыч Татьяна Галкинан, Курыкмарий район гыч Елена Гаранинан СВО-н участникше да нунын подвигышт нерген каласкалымышт чонышкак логалын.
Ӱдыр-влакын мастарлыкыштым жюри аклен. Тӱрлӧ номинацийыште сеҥыше-влаклан дипломым, пӧлекым да пеледыш аршашым кучыктеныт.
– Сеҥымашке лекмылан моткоч йывыртенам. Тӱшка тыршыме дене веле сеҥымашке шуаш лиеш, маныт. мыйын шотыштат тыгак, садлан пашам пырля ыштыше туныктышо-влаклан моткоч кугу таум ойлем, – чонжым почо Гран-прим налше Татьяна Галкина. – Тиде сеҥымашым Ваня шольымлан пӧлеклем, Тау тудлан. Мураш йӧратымем шольым пален да сценыш лекмем эреак вучен. Уке лиймыжлан 8 мартыште кок ий лиеш гынат, эреак пеленем шижам.
Иктешлымаш
Тыгай конкурсым эртараш тӱҥалмым сайлан шотлыман. Тудын гоч ме участник-влакын моторлыкыштым, чолгалыкыштым ужына, а мастарлыкым ончыктымышт гоч кундемнан илышыже, поянлыкше почылтыт.
Аклыммут
Ренат Магсумов, жюри член, «Защитники Отечества» фондым вуйлатыше:
- Сеҥышым ойырен налаш моткоч неле ыле: каҥашенна, ӱчашенна… Те, ӱдыр-влак, чылан тӱрлӧ, но тыгодым кажныже шкешотан, ойыртемалтше… улыда.
Илышна, тӱняна ончычсо гай нигунам огеш лий. Тидым пытартыш конкурс эше ик гана пеҥгыдемдыш. Шинчавӱд йӧре кажныдам колыштым, моткоч кугу тау тыланда. Кугешнем тунамсе да кызытсе геройна-влак дене, кугешнем тендан дене! Те чыланат сеҥыше улыда!
Алевтина БАЙКОВА
Авторын фотожо
