Тений севок шоган моткоч сайын шочын, но ала-молан шӱеш, сандене арам лийме деч тудым эше иктаж пайдалан кучылтмо шуэш. Тиде пакчасаскам косметологийыште кумдан кучылтмо нерген колынам. Ала иктаж рецептше дене палдарен кертыда? Ончылгоч тауштем.
И.ЖАРКОВА
Морко район
Чын, шоганым калык медициныште веле огыл, косметологийыштат кумдан кучылтыт. Тудын дене кылдалтше икмыняр рецептым темлена.
Арава деч. Такшым тудо моторын коеш, но огешак келше гын, шоган сок полшымо дене ошемдаш лиеш. Тидланже 1 кугу совла дене налме шоган сокым, мӱйым, 6 процентан олма уксусым пырля йӧрыман да тиде вартышым коваштыш кечеш 5-6 гана йыгыман.
0,5 стакан шопышо шӧр, тёркеш нӱжымӧ 1 изи совла шоган, 0,5 изи совла лимон сок, 1 кугу совла крахмал дене ошемдыше маскым ямдылаш лиеш. Темлыме ингредиентым пырля йӧрыман, коваштыш йыгыман, 20 минут гыч юалге вӱд дене мушкын колтыман. Вара питательный кремым йыгыман. Тиде йӧн дене арняште 2-3 гана пайдаланыман.
Чӱнча деч. Тургыжландарыше верлашке шоган сокым кечеш 2-3 гана йыгыман. Тидым чӱнчан кошкымешкыже ыштыман.
Ӱп йогымо деч. Икнаре налме шоган сок ден коньякым пырля йӧрыман. Лопшудо дене отварым посна ямдылыман: 1,5 изи совла коштымо кушкыл вожыш 1 стакан шолшо вӱдым темыман, «вӱд мончаште» 10 минут кучыман да шӱрыман. 6 ужаш отварыш 1 ужаш шоган-коньяк вартышым ешарыман да тиде средствым вуй коваштыш йыгыман. Вуйым шӱртӧ кӱпчан солык дене пӱтыралман, 2 шагат гыч пушкыдо шампунь дене мушман. Тидым ик тылзе жапыште кажне кечын ыштыман.
Вуй чараҥме деч. Тидланже икнаре налме йошкар шоган сокым, лимон сокым да мӱйым пырля йӧрыман, тиде вартышым вуй коваштыш йыгыман. 1 шагат гыч пушкыдо шампунь дене мушкын колтыман. Процедурым пел але 1 тылзе жапыште кече еда ыштыман.
Лыге деч. 1 кугу совла дене налме шоган сокым, лимон сокым, лопшудо ӱйым да 1 кӱчымӧ муноптемым пырля лугыман, тиде вартышым вуй коваштыш йыгыман, вуйым солык дене пӱтыралман. 2 шагат гыч маскым йоча шовын дене мушкын колтыман, вара нуж але куэ лышташ настой дене шӱалтыман. Тидым арняш 1 гана ыштыман. Темлыме маске лыге деч веле огыл полша, тудо тыгак ӱп вожым пеҥгыдемда. Маске дене шогылтмо огеш шу гын, вуй коваштыш шоган сокым але немырым йыгаш лиеш. Тиде процедурым арняш 1-2 гана ыштыман.
Вӱдотыза да коваште чоштыраҥме деч. Йолтаганысе коваште чоштыраҥын гын, шоганым тёркеш нӱжыман да тынарак мӱй дене йӧрыман. Вартышым локтылалтше ужашыш йӱдлан йыгыман, марле але лапчык дене петырыман да бинт дене пӱтырен кучыктыман. Эрдене повязкым корҥдыман, коваштын пушкыдемше лончыжым шекланенрак кораҥдыман да вара питательный кремым йыгыман. Тиде йӧн дене кукшо вӱдотызымат пытараш лиеш. Вес йӧн: кокла кугытан шоганым кӱктыман, пелыгыч пӱчман да кукшо вӱдотызаш пыштен кучыктыман. Тиде процедурым йӱдлан ыштыман. Эрдене повязкым кораҥдыман, йолым шокшо вӱдыштӧ паритлыман да вӱдотызам эскеренрак кораҥдыман.
Маргарита ИВАНОВА ямдылен
М.Иванован фотожо/ «Марий Эл» увер агентстве
ТЕМЛЫМЕ ЙӦН ДЕНЕ ПАЙДАЛАНЫМЕ ДЕЧ ОНЧЫЧ ВРАЧ ДЕНЕ КАҤАШЫЗА!
