Кеҥеж тӱҥалмеке, отпускым кажныже чон вургыж вуча. А каныш жапым чылан сайын да пайдалын, ушеш кодшын эртараш тыршат.
Йолташ-влак, те отпускдам кушто да кузе эртараш шонеда? Кушко канаш кайынеда ыле?
Мария СОЛОВЬЁВА, Марий Эл культурын сулло пашаеҥже, РФ правительствын «Душа России» премийжын лауреатше:
– Отпусклан Медведево район Шойбулак ялыште, ача-авамын сурт-печыште лияш келша, тудым сӧрастарен, пакча-саскам очен кушташ йӧратем.
Морко районышкат родо-влак деке миен толашак тыршем. Шочмо Пумыр ялышкем, пошкудо Чодырасолашке, Тыгыде Моркышко шӱжарем-влак деке миен шуаш шонем. Морко посёлкыштат родем-влак шукын илат. Чылаштым аклем, пагалем, кажныж дене уна лияш йӧратем.
Отпуск жап шукыж годым гастрольышто эрта. Теният «Марий памаш» ансамбль дене июнь тылзыште Татарстан, Башкортостан республиклаш миен толаш палемденна, а августышто Мордовийыш каяш ямдылалтына.
Виталий Бурков, «Марий Эл» ГТРК-н корреспондентше:
– Тений августышто канаш тӱҥалам. Каныш жапыште утларакше Йошкар-Ола воктенысе сад-пакчаште лияш келша, вет лач тунам ончен куштымо саска, емыж чоным куандарат. Иктаж кечын Марий Элнан мотор да яндар ерышкыже лекташ, родо-тукым декат миен толаш тыршем. Шочмо суртем петырыме гынат, родо, пошкудо-влак дене вашлияш чон ӱжеш.
Пӱртӱсыш лектын, чоным кандараш, чодыраште поҥгым погаш йӧратем.
Галина СОЛОВЬЁВА, Марий самырык театрын артистше:
– Каныш жаплан ялышкем каем. Пашам ыштыме семын канышыжат пайдалын эрта. Тыгак Звенигово, Советский, Медведево районлаште илыше родо-тукымем деке миен толаш тыршем. Нунын дене Шелангуш эҥер воктеке икмыняр кечылан палатке дене лекташ шонена. А туштыжо молгунамсе семынак шурпам шолтена, шикшеш шылым кӱктена, ӱчаш-ӱчаш колым кучена.
Емыж, саска кӱын шумеке, чодырашке, олыкыш погаш каена да телылан тутло шапашым ямдылена.
Светлана АЛЕКСАНДРОВА, М.Шкетан лӱмеш Марий национальный драме театрын артистше:
– Байкал тӱнямбалне эн яндар ерлан шотлалтеш. Шукертсек тудым ужаш шонем, отпуск жапыште тушко миен толаш гын, сай ыле… Адакшым автомашина дене изам деке Краснодарышкат каяш шонымаш уло.
А.Байкова
Фотом интернет гыч налме
