Марий Эл Радион хит-парадше
Йолташ-влак, тендан полшымо дене кодшо арняште мурызо-шамыч шке коклаштышт тыгайрак «тошкалтышым» чоҥеныт.
- Геннадий Васильев, Таисия Смирнова – «Шарнымаш кас»
- Эльмира Усова – «Могай пиал»
- Татьяна Галкина – «Аваем, ачаем»
- Володя Матвеев – «Ӱдырем»
- Карина Королёвва – «Ах, могае сылне пагыт»
- Иван Смирнов – «Марий кас»
- Наталья Богданова – «Кертат чыла сеҥен»
- Иван Соловьёв – «Ару урем»
- Мария Бердникова – «Рвезе пагыт»
- Никита Козлов – «Шындышым мый йӧратен»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Шочмо кечылан – пӱртӱсын шым тӱсан пӧлекше
Марий Эл Радион 21 ияш лӱмгечыжлан пӧлеклалтше чапле кугу концерт тений Пеледыш пайрем кечын Марий паркыште эртен.
Этнодискотеке сынан пайрем касыш изижге-кугужге рӱж погыненыт. Сценыште кумдан палыме лӱмлӧ артист-влак дене пырля самырык мурызо-влакат сылне йӱкышт дене куандареныт, гармоньым шоктымо мастарлыкышт дене палдареныт да, йыр шогалын, тавалташ таратеныт. Сылне семеш шем пылат пуйто шулен, чевер кече ончалын, а ик тат гыч шым тӱсан шонанпыл пайрем шӱлышым эшеат пуртен.
Радиовӱдышӧ-влак шке йолташыже-влаклан концерт жапыштат тӱрлӧ конкурсым эртареныт да ончылгоч увертарыме «Выр-выр» конкурсыштымат иктешленыт. Сеҥыше-влаклан тӱрлӧ пӧлекым кучыктеныт, а эн тӱҥ приз, велосипед, дене Советский район Кодам гыч Ольга Эльтемерова палемдалтын. Конкурсыш тудо нал пашам колтен улмаш.
Марий Эл Радион йолташыже – тӱня мучко. Кумда элнан тӱрлӧ кундемже гыч ончаш да жапым веселан эртараш толшо-влак тидым сайынак пеҥгыдемденыт. Вес семыже лийынжат огеш керт, вет радиом колыштын, ме кумылнам нӧлтена, пашам ыштена, родо-тукымлан, лишыл еҥлан саламым колтена да яра жапнам пайдалын эртарена.
Алевтина БАЙКОВА
Валерий Поликарповын фотожо
