Килемарыште «Российысе калык-влак – ик команде» доброволец-шамыч форум 170 утла волонтерым поген.
Посёлкысо кыдалаш общеобразовательный школышто эртыше мероприятийыш Килемар округ, республикысе районла, Киров ден Нижегородский областьла гыч доброволец-влак толыныт. Форумын тӱҥ цельже – опыт дене палдараш да специальный военный операцийын участникше-влаклан полышым пуымо кышкарыште шуктышаш пашам виктарен колташ.
Регион вуйлатыше Юрий Зайцев погынышо-влак ончылно ойлымыж годым Россий президент Владимир Путинын каласымыжым ушештарен: «Мемнан чылананат вӱрыштына – лишыллан, йорлын илышылан полшаш».
– Те чынжымак шуко нациян, тӱрлӧ ийготан ик команде улыда. Кажныжын шке пашаже уло, но тендам чыландамат икте уша – шочмо элым йӧратымаш, специальный военный операцийыште улшо рвезына-влаклан уло кумылын полшаш. Нуно шке кундемдан, элнан шокшыжын намиен шуктымым кӱкшын аклат. Тидыже боецна-влаклан, Сеҥымашналан моткоч кӱлешан, – палемден регион вуйлатыше.
Школ негызеш тӱрлӧ мастер-классым виктарен колтымо. Волонтер-влак аралтышым, талисманым ямдылаш, тактический браслетым пидаш, окоп сортам да маскироватлыме сетьым ышташ тунемыныт. Чыла тидым боецна-влаклан передовойыш колтат.
Мероприятийын торжественный ужашыштыже Юрий Зайцев округышто илыше-влаклан сулен налме награде-влакым кучыктен. Тыгодым тудо мер илышыште ойыртемалтмыштым да армийлан полшымыштым палемден. II степенян «За воинскую доблесть» медаль дене специальный военный операцийын участникше Сергей Сидельников наградитлалтын. Верысе самоуправлений органлаште кужу жап да уло кумылын тыршымыжлан Марий Эл Республикын Тауштымашыж дене Килемар муниципал округ администраций вуйлатышын алмаштышыже Анна Ширяева палемдалтын. «Марий Эл Республикым ыштымылан 105 ий» шарнымаш медальым Вӹзӹмйӓр йоча усталык школын директоржо Анна Бранькова ден Татьяна Васениналан кучыктымо. «Юнармий» йоча-юношеский военно-патриотический движенийын Тӱҥ Всероссийский штабшын начальникшын приказше дене II степенян «Юнармейский доблесть» знакым муниципальный округын тунемшыже-влак Дмитрий Гулинын, Максим Ожигановын да Кристина Соколенкон оҥышкышт пижыктыме.
Регион вуйлатыше школым ончен лектын. Тушто йочалан вияҥашыже чыла йӧным ыштыме: спортзал, бассейн, йоча усталык школ, ешартыш шинчымашым пуышо рӱдер улыт. «Кажне йочан сеҥымашыже» нацпроект дене ыштыме йоча творчестве рӱдерыште у направлений-влак – робототехнике гыч тӱҥалын, йоча киностудий марте – почылтыныт.
Марий Эл вуйлатышын пресс-службыжын уверже негызеш Вячеслав Смоленцев ямдылен.
