Марий Элым вуйлатыше Юрий Зайцев палемден: «Образований – ончыкылыкыш сай инвестиций, сандене республикысе школ-влакым уэмдыме пашам умбакыже шуена».
Ты кечылаште Морко кундемыште паша дене лиймыж годым тудо Шеҥше кыдалаш школыш миен. 2023 ийыште тунемме верыште «Образованийын школ системыжым уэмден вияҥдымаш» федерал программе почеш капитально олмыктымо паша ышталтын. Тидлан да мебель ден оборудованийлан Россий Федерацийын бюджетше гыч 61,6 миллион теҥге, республикын гыч 7,7 миллион теҥге ойыралтын.
Регионым вуйлатыше уэмдыме школым ончен лектын. Кызыт тыште 105 икшыве тунемеш, тидын деч посна 27 йочан кок дошкольный группо уло. Нунын дене 40 педагог ден воспитатель пашам ышта.
2018 ийыште федеральный бюджет кӱшеш школышто спортзалым капитально олмыктеныт, тидлан 1,8 миллион теҥгем ойырымо. Ӱмаште тунемме верыште естественно-научный направлений дене «Кушмо точко» рӱдер почылтын. Тушто йоча-влаклан кызытсе жаплан келшыше оборудований полшымо дене ешартыш шинчымашым налаш йӧн уло.
Марий Элым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
