2022 ийыште Марий Элыште образований системым уэмден вияҥдыме дене кылдалтше программым илышыш пурташ тӱҥалме, 2023 ийыште тудо умбакыже шуйна.
Каласыман, мемнан республиклан тыгай программе моткочак кӱлешан, молан манаш гын кундемыштына ялысе школ шуко уло. Нуно тачысе кечылан келшыше лийшаш улыт, сандене тунемме вер-шамычым уэмден олмыктыман.
Каласыман, программыш пуртымо школым капитально олмыктымо йодыш шотышто туныктышо, тунемше да ача-ава-влак дене каҥашат, нунын темлымыштым шотыш налыт. Тыге ӱмаште республикнан икмыняр тунемме вержым уэмден ачалыме веле огыл, тыгак учебный пособийла дене пойдарыме, туныктышо-шамычлан квалификацийыштым нӧлташ йӧным ыштыме.
Тений 10 муниципальный районын 13 общеобразовательный организацийжым капитально олмыкташ палемдыме. Тиде пашалан чумыр налмаште 846 миллион теҥгем ойырат.
Тыгак палемдыман: 2022 ийыште «Образований» национальный проектын «Кажне йочан сеҥымашыже» федеральный проектше дене келшышын, Марий Элыште кум спортзалым олмыктымо, кок сооруженийлан у оборудованийым налме да ик школын спорт клубшылан инвентарьым ойырымо.
2023 ийыште ялысе тунемме верлаште вич спортзалым олмыкташ палемдыме. Тиде – Волжский район Купсола тӱҥ, Звенигово район Мочалище кыдалаш, Оршанке район Тошто Крешын тӱҥ, Параньга район Элнет тӱҥ да Юрино район Козиково кыдалаш школаште.
Г.Кожевникова
Фотом Марий Эл Образований да науко министерстве гыч налме
