Российын Тазалык аралтыш министерствыже 14-20 июльым Половой йӧн дене куснылшо инфекций деч аралалтме арня семын увертарен.
Половой йӧн дене куснылшо инфекций тазалыклан кугу лӱдыкшым ышта, молан манаш гын тудлан кӧра исырлык ден хронический чер вияҥыт, кӧргӧ орган-шамыч локтылалтыт, да айдеме эсогыл колен кертеш.
Половой йӧн дене могай инфекций кусна?
Эн кумдан шарлыше инфекцийлан шотлалтыт:
— вирусан: ВИЧ, айдеме папилломын вирусшо, герпес, В ден С гепатит-влак;
— бактериян: гонорей, сифилис, хламидиоз, микоплазмоз;
— паразитан: трихомониаз.
Организмым авалтыше южо чер шкеж нерген утыжым огеш палдаре гынат, вес еҥлан куснен да тазалыклан кугу зияным ыштен сеҥа.
Врач деке кунам куржман?
Нине ситыдымаш-влакым шотыш налде кодыман огыл:
— половой орган гыч йогышо йыгыжге ӱпшан да келшыдыме тӱсан вишкыдым;
— половой органыште когартымым, лӱгыштыктымым, шалме годым корштымым;
— йорам, йошкаргымым, тазыла чораш лекше чӱнчам;
— мӱшкыр йымалне корштымым;
— вожгоклаште лимфатический пышкемын кугеммыжым.
Кузе аралалтман?
Аралалтме тӱҥ йӧн-влаклан шотлалтыт:
— презерватив – половой йӧн дене куснылшо инфекций деч 100 гыч 98 процент случайыште аралыше контрацепций. Тудо половой кыл гоч черланен кертме лӱдыкшым палынак иземда;
— вирусан южо инфекций деч сай вакцине уло. Айдеме папилломын вирусшо ваштареш палемдалтше вакцинаций авагудо шейкым рак дене черланыме деч арала, половой орган ден кутанрож кундемым – шыгыле авалтыме деч. В гепатит ваштареш вакцинаций мокшым пытарыше вирусым чактара;
— поснак алкоголь дене руштмо але наркотик дене аҥыргыме годым палыдыме еҥ дене икте-весым йӧратен малыме деч шекланыман. Айдемын половой партнёржо мыняр шуко, куснылшо инфекций дене черланен кертме лӱдыкшӧ тунар кугу. Ты шотышто ик еҥ дене кылым кучаш пайдалырак да ӱшанлырак;
— шкем жапын-жапын врачлан ончыктыман. Половой йӧн дене куснылшо южо инфекций шкенжым палдарыде вияҥеш, сандене, ситыдымаш уке гынат, идалыклан ик гана медицине велым тергалтман. Аралалтде але у партнёр дене малыме деч вара анализым сдатлаш темлалтеш;
— гигиенылан палемдалтше шке средстве (бритве, солык, йымал вургем) дене гына пайдаланен, вожгоклам авалтыше тий да вирусан герпес гай южо инфекций деч аралалташ лиеш;
— половой йӧн дене куснылшо инфекций дене черланаш огыл манын, эн ончычак шке тазалыклан мутым кучыман, тыгак половой партнёр ончылно ответственный лийман.
Ала-мо умылаш лийдыме йогаш, лӱгыштыкташ, шалме годым але секс деч вара коршташ тӱҥалын, чӱнча лектеден гын, ида вожыл, жапым шуйкалыде, дерматовенерологын приёмышкыжо кайыза.
Врач-влак ОМС полис дене кажне паша кечын яра приниматлат. Адресна: Йошкар-Ола, Келшымаш урем, 93-шо пӧрт. Приёмыш ончылгоч возалтме телефон: 8(8362) 41-99-34.
Дарья ЛУЧИНИНА,
Марий Эл Тазалык аралтыш министерствын дерматовенерологий да косметологий шотышто штат деч ӧрдыжысӧ тӱҥ специалистше.
Маргарита Иванова ямдылен.
Марий Эл Тазалык аралтыш министерствын фотожо.
