Теве Кугу Мушко ялыште Кинг-Конгымат, динозавр-влакымат ужыныт…
Кугу Мушко ялыште илыше Борис ден Анна Тымбаршевмытын суртышт ончылно шочшо шкешотан зоопаркым тлетла нигушто от уж, очыни. Могай гына янлык уке: динозавр, бронтозавр, мамонт, пӱчӧ, Баба-Яга гай йомакысе ала мультфильмысе моло персонаж. Лумӱдыр ден Йӱштӧ Кугызажат улыт. Эсогыл Кинг-Конгым ужаш лиеш. Мо оҥайже: лум гыч ыштыме скульптур-влакым ончетат, пуйто чынжымак нуно илыше улыт. Суртоза изинек динозавр-влакым сайын сӱретлен, а ынде кумшо ий лум гыч ненчен ышта. А пелашыже, нуным шотышто кучаш манын, вӱдым опта, кӱлеш гын, чиялта. Южгунам кечылан икмыняр-ганат. Тиде шкешотан йомак зоопаркым ончалаш эсогыл ӧрдыж кундемла гычат лӱмын толыт.
С.Носова
Снимкылаште: Тымбаршевмытын йомак «зоопаркыштышт».
Фотом Марий Элын Туризм да спорт министерствыжын соцкыл лаштыкше гыч налме.
