Кодшо каныш кечылаште Кужэҥер район Визым ялысе «Марий Швейцарий» каныме базыште шке автомобиль дене путешествоватлыше-влакын «Йолташ-влакын вашлиймашышт» фестивальышт эртен.
Тушко Челябинск, Пермь, Иваново, , Саранск, Москва, Казань, Киров, Екатеринбург, Чебоксар, Йошкар-Ола олала, Ханты-Мансийск кундем, Краснодар край гыч толыныт. Эсогыл Великобританий гыч ик еҥ лийын. Чылаже – 70 наре экипаж. Тушто лийше южо еҥын ойлымыж почеш, фестиваль, чынжымак, поро йолташ-влакын вашлиймашышт семын эртен. А кӧ але марте палыме лийын огыл гын, икте-весышт дек пеш вашке лишемын шуктеныт.
Уна-влакым саламлаш Кужэҥер район администраций вуйлатышын алмаштышыже Надежда Желонкина, Руш Шой ял муниципал образованийым вуйлатыше Владимир Иванов миеныт. Районысо тӱвыра пӧлка пашаеҥ-влак, усталык коллектив-влакым ушен, оҥай программым ямдыленыт. Тувыртыш когыльым ыштыме мастер-класс уна-влакын кумылыштым налын. Кастене этнодискотеке эртен.
Фестивальын тӱҥ организаторжо Сергей Мамаевлан воткыл лаштык гоч тауштымашымат шукын серат. Мутлан, кодшо ийысе тыгай фестивальыште 40 наре экипаж веле лийын. Тений тудым эртараш келшен толшо верым ойырен налыныт. Кӱ курык кумдыкысо пӱртӱсшак канаш толшо-влакын кумылыштым савыра. Каныме базысе памаш вӱдан мончаш мушкылт лекмыштат ушешышт кодын, очыни. Эшежым игечыжат пеш лачеш толын. Санденак, воткыл лаштыкла гоч фестивальыште лийше-влакын возымыштым лудат да умылет: огыт мондо Визымыште эртыше вашлиймашым элнан тӱрлӧ олаж гыч толшо уна-влак. Фестиваль Марий Элын Туризмым вияҥдыме шотышто агентствын полшымыж дене эртен.
Снимкыште: шарнаш фото
Фотом Кужэҥер районысо рӱдӧ клуб системын воткыл лаштыкше гыч налме.
