Марий Эл Кугыжаныш Погынын председательже Михаил Васютин икымше созыв парламентын вуйлатышыже Анатолий Смирнов дене вашлийын.
Элыштына, ты шотыштак марий кундемыште, кучемын представительный органже-влакым, верласе шкевиктем-шамычын органлаштым реформироватлыме деч вара Анатолий Анатольевич 1994 ийыште уэмдыме марий парламентын вуйлаташ тӱҥалын. Тиде жап простажак лийын огыл, молан манаш гын политический системе эше пеҥгыдемын шуын огыл да кугыжаныш кучемын пашажлан келшыше модельым кычалын.
Икымше депутат-влакын вачӱмбакышт пеш кугу паша возын – республикыште илыше чыла еҥын интересшым шотыш налын, Марий Элын Конституцийжым ямдылаш. Тӱҥ Законым 1995 ий 24 июньышто лукмо.
Марий парламентын историешыже кодшо тиде событийлан вашке 30 ий темеш. Тиде датылан пӧлеклалтше икмыняр мероприятийым эртараш палемдыме.
– Анатолий Анатольевичым тушто участвоватлаш да марий Конституцийым ямдылыме нерген радамынрак каласкалаш ӱжым. Опыт ден шарнымаш-влак кызытсе депутат-шамычлан пайдале да оҥай лийыт манын шонем, – палемда Михаил Зиновьевич.
Маргарита ИВАНОВА
Марий Эл Кугыжаныш Погынын пресс-службыжын фотожо.
