Марий Элыште шояк ӱйым, сырым, ӱмбалым да торыкым мумо.
Роспотребнадзорын Марий Элысе виктемжын специалистше-влак 9 тылзаш пашаштым иктешленыт. Тиде жапыште санитарный врач-шамыч шӧр ден шӧран продукцийым ямдылен лукшо предприятий-влакын сатушт гыч 690 пробым налыныт да ты чот гыч латкокытыштыжо технический регламентым шуктыдымым рашемденыт. Кок пробо микробиологический показатель дене келшен толын огыл, 10 – идентификаций показатель дене.
Шояк сату радамыш «Модус» ООО-н (Москва область), «Продстандарт» ден «Велда» ООО-влакын (Челябинск область), «Милкопт» ООО-н (Татарстан Республик), «Айсберг-Плюс» ООО ПК-н (Москва область), амалкалче А.Н.Бекреневын (Пенза ола) да «Шокта» фирме» ООО-н (Марий Эл) ӱйышт, сырышт, ӱмбалышт да торыкышт пуреныт.
Рашемдыме факт шотышто уверым предприятийлашке колтымо, а шояк сату нерген уверым – Потребительын праважым аралыме аланыште кугыжаныш увер ресурсыш.
Тергымашым иктешлыме почеш нарушитель-влаклан чумыржо 282 тӱжем теҥгеаш штрафым пуымо.
Норматив дене келшыдыме, кӱлешан маркировкыдымо да аралыме жап гыч лекше шӧран продукцийын 973,7 кг 11 партийжым ужалымаш гыч кораҥдыме.
Шӧран продукцийын качествыже да лӱдыкшыдымӧ улмыж шотышто тергымаш умбакыже эртаралтеш.
М.ИВАНОВА
