Пошкырт кундем Мишкан район Ирсай ялыште марий композитор Алексей Искандарович Искандаровын шочмыжлан 120 ий теммыжлан пӧлеклалтше шарнымаш митинг эртен.
Композиторын шочмо ялыштыже тудлан шогалтыме бюст воктеке шуко еҥ погынен. Нунын коклаште Мишкан район администраций вуйлатыше Лариса Александрова, Искандаровын кугезе тукым шольыжо Вячеслав Камилянов, «Эрвел марий» калыкле- тӱвыра автономийым вуйлатыше Радион Плотников да молат лийыныт. Мутым налше-влак лӱмлӧ землякыштлан марий калыкын сымыктышыжым вияҥдымашке надырым пыштымыжлан тауштеныт.
Кастене Мишкан селасе Марий историй да тӱвыра рӱдерыште РСФСР да Марий АССР сымыктышын сулло деятельже да Марий АССР кугыжаныш премийын лауреатше Алексей Искандапров лӱмеш кугу концерт эртен. Тушто районысо марий ансамбль ден посна солист-влак композиторын семжылан возымо ятыр мурым йоҥгалтареныт. Композиторын лӱмжым нумалше Ирсай школ гычат тунемше-влак, Ирсай ял шотан илемын хоржо, «Чолга шӱдыр» вокальный ансамбльже концерт программым пойдареныт. Марий историй да тӱвыра рӱдер вуйлатыше Алексей Ибулаев саксофон дене шоктен мурымыжым зал шокшын вашлийын. Концерт участник-влакын палемдымышт почеш, Алексей Искандаровын музыкыжо – марий тӱвыран эртыше жапше ден ончыкылыкшо кокласе кӱвар. Тек тудо эреак йоҥга да калыкнам куандара.
Снимкыште: митингыш шуко еҥ погынен.
Фотом Ирсай ял шотан илемын воткыл лаштыкше гыч налме.
