Чумыр тукым кая. Марий республикына да калыкна верч вийыштым, жапыштым, тазалыкыштым чаманыде йӱдшӧ-кечыже тыршыше, виян, пеҥгыде койыш-шоктышан, но айдеме кумылым ужын моштышо вуйлатыше-влак кокла гыч иктыже, Александр Соловьев, шуко жап черле кийыме деч вара ош тӱня дене чеверласыш.
А.А.Соловьев 1946 ий 31 августышто Звенигово район Нурдамучаш ялеш шочын-кушкын. 1967 ийыште Витебск оласе связь электротехникумышто тунемын. Вара Всесоюзный связь электротехнический институтышто заочно шинчымашыжым нӧлтен. 1969 ийыште Йошкар-Олаште, республикысе типографийыште тыршен, ПТУС инженер гыч тӱҥалын тӱҥ инженер марте кушкын. Тыгодымак, паша деч кӱрылтде, Москосо полиграфий институтышто тунемын. 1981 ийыште Госкомиздат председательын алмаштышыжлан шогалтеныт, тыгодымак тӱҥ инженер сомылжымат шуктен. 1988 ийыште Республикысе полиграфий да редакций-влакын объединенийыштын (вес семынже типографийын) генеральный директоржо лийын, а 1993 ийыште Марий полиграфий да издательстве комбинатыш савырымек, тудым умбакыже вуйлатен. Тунам комбинатыште Марий Элыште лекше чыла газет ден журнал-влак печатлалтыныт, райгазет-влакат савыкталтыныт. Кажныжын тиражше кугу лийын. Паша шолын. Жап у йӧным шыҥдараш йодын. Тыге А.А.Соловьевын тыршымыж дене изданий-влакым офсетыш кусареныт, печатьыш пуымо деч ончыч чыла процессым компьютер дене ышташ тӱҥалыныт.
Но кодшо курымын 90-шо ийлаштыже, элым пужен ыштыме пагытыште, парышым кондышо предприятий кугу нелылыкыш логалын. Печатлыме роскотым петыраш редакций-влакын оксашт ситен огыл. Александр Александровичын полиграфий пашам сайын палымыжлан, пашаче коллектив да заказчик-влак дене кылым ыштен моштымыжлан, пеҥгыдын йодмо койыш-шоктышыжлан кӧра типографий чарныде пашам ыштен. Мемнан «Марий Эл» газетымат, моло изданийымат, кутырен келшыме почеш, оксам вучымеш савыктеныт. Вуйлатыше семын Александр Александрович шкеныштын пашаеҥже-влаклан пашадарым тӱлаш тӱрлӧ йӧным кычалын. Заказчик-влакым Марий Элыште гына огыл, моло кундемлаште, Москваште, вес олалаште муын, кугу тираж дене огыл гынат, садак печатленыт – тунам ик ырже теҥгела чучын. Тыге полиграфий паша провой вел марийын ӱмырашлык профессийышкыже савырнен.
Но республикын тунамсе вуйлатышыжын кӱштымыж почеш предприятийым панкрутыш лукмеке, Комсомольский да Коммунистический (кызыт Кремлёвский) уремла лукышто шогышо кугу зданийын у «озаже» лекмеке, А.А.Соловьевлан у паша верым кычалашыже пернен. Тыге 2002 ийыште «Марий кагаз комбинат» ООО-м почын. Тушто ыштымыж годымат тошто палымыже, коллегыже да йолташыже-влаклан полыш кӱлмӧ годым нигунам вуйым шупшын огыл.
Александр Соловьевым пагаленыт, тудын деч ой-каҥашым йодыныт. Йолташыже-влак шке коклаштышт тудым Сан Саныч маныныт. Полиграфий пашашке кугу надырым пыштымыжлан 1996 ийыште Марий Эл тӱвыран сулло пашаеҥже лӱмым пуэныт.
…Вес тӱняште илыш уло гын, Александр Александрович туштат савыктыш пашамак шукташ тӱҥалеш, очыни. Туге чучеш. Тушто, мыланна койдымо тӱняште, Соловьев гай тале специалист кӱлеш лийын дыр, сандене пагалыме йолташна мемнам коден каен. Кийыме мландыда пушкыдо лийже, Сан Саныч…
Кугу чаманымаш дене
«Марий Эл» газетын коллективше
