ТАЧЕ ЯЛЫШТЕ

Шӱмлан келша гын, чонлан ласка

Кумыл йодмо паша

Шӱмлан келша гын, чонлан ласка

Кидмастар Василий Чернов Йошкар-Ола кундемыш пурышо Савино ялыште верланыше коррекционный школ-интернатыште 17 ий тырша.

– Мый Марий кугыжаныш университетыште биологлан тунем лектынам, – ойла тудо. – Кидпаша шотышто ойлаш гын, изи годсекак пушеҥге гыч пӱчкедаш йӧратем. Товарым кидыште кучен мошташ эше кочамак туныктен, вара гына товартошым ыштенам. Садлан тиде тунемме верыште «Трудовое обучение» предмет – кумыл йодмо, чонемлан келшыше паша.

Василий Александрович дене «Трудовое обучение» кабинетыштак мутланена. Йоча-влак туныктышым тӱткын ончат да, ойлымыж почеш, пӱчкедат, перкалат, чертитлат…

– Мый нуным тӱҥ шотышто тӱрлӧ ӱзгар дене пайдаланаш туныкташ тыршем.  Ынде шкеже туныктем, каласыш кидмастар.

Василий Чернов пӱртӱсым йӧрата. Сандене яра жапше годым чодыраш кая, тушто келшыше укшлам, пушеҥгым, оҥай вожым кычалеш. Пӧръеҥ поснак лӱмегожым йӧрата. Тиде пушеҥе гыч мом гына ок ыште: кухньылан йӧршӧ оҥам, сорталан да молылан атым. Ойлымыж почеш, чодыраште кидмастарлан 120 ияш лӱмегожат вашлиялтын.

– Уроклан материалым, мланде ӱмбалне кийышым, чодыраште шкак погена, – умбакыже ойла Василий Александрович. – Пытартыш жапыште волым ыштылынна. Пашанам эреак республик кӱкшытан ярмиҥгашке луктынна, но, чаманен каласыман, пытартыш кок ийыште тудо эртаралтын огыл.

Школ-интернатыште пашам ышташ 2016 ийыште тӱҥалын, а тидын деч ончыч Советский посёлкысо 2-шо №-ан  школышто ОБЖ-ым туныктен.

– Школышто ышташ неле лийын гынат, йоча-влакым садак туныктыман, – умбакыже мутшым шуя Василий Александрович. – Южышт начарын ужыт гынат, моткочак тыршат. Теве изи вичкыж оҥа гыч подставкым погена, тыгак тӱрлӧ пӧлекым, модышым ямдылена. Кумыж лышташ гыч мом гына огына ыште. Чылажге тиде школышто йоча-влакым 12 ий туныктена. Коррекционный тунемме верыште пашам ыштыше туныктышо чытышан лийшаш. Рвезе-влак дене пырля ӱдыр-шамычат моштымашыштым вияҥдат, но нуныжо шукыжым ургымо пашалан тунемыт.

Туныктышо мылам умбакыже тунемше-влакын кидышт дене ямдылыме тӱрлӧ атым да моло арверым ончыктыльо. Ойлымыж почеш, шкенжын икымше кидпашаже – аралтыш. Вара тыгайымак йолташыже автомашинаш сакаш ышташ йодын.

– Арверым ужалыме окса дене лобзикым, клейым, кӱлешан ӱзгарым да молымат налына. Южо станокымат тыгай йӧн денак налме.

 

М.СКОБЕЛЕВ

Авторын фотожо.

Снимкылаште: 1900 — Кидмастар В.Чернов 1904 — Писте гыч ыштыме ате 1942 — Пӱчкыш гыч арвер 1953- Урокышто

 

Опубликовать в Одноклассники

Добавить комментарий