Россий акций
«Сеҥымаш тулым аралена»
Кугу Отечественный сар ийлаште колышо воин-земляк-влаклан Медведевысе монумент ончылно эше ик курымашлык тулым чӱктымаште Марий Эл вуйлатыше Юрий Зайцев лийын. Тиде торжество 9 Май вашеш «Сеҥымаш тулым аралена» Россий акций дене келшышын эртен.
«Мемнан элна – сеҥыше эл. 1945 ийыште тудо ты почётан лӱмым сеҥен налын да курымла дене тыгай кодеш», – каласен Марий Эл вуйлатыше.
Проект тений февральыште илышыш пурталташ тӱҥалын, тидлан элна мучко 120 мемориалыш пӱртӱс газым пуымо. Тиде пашам Россий Федераций президент Владимир Путинын кӱштымыж почеш «Единая Россия» партийын полшымыж дене «Газпром» ПАО шукта.
Марий Элыш Сеҥымаш тулым Россий Герой Дамир Шаймардановын аваже Ирина Викторовна конден. Тудо Москвасе Палыдыме салтакын шӱгарже воктене Курымашлык тул тӱҥ мемориал деч чӱкталтын. Лампадым кондаш Россий Калык фронтын рӱдӧ исполкомжым вуйлатышын советникше Василий Бочкарёв полшен.
Медведевыште Сеҥымашын 30-шо идалыкше вашеш 1975 ийыште чоҥымо комплексыште тиде кӱлешан мероприятийлан олмыктымо пашам шуктымо. Брусчаткым вашталтыме, мемориал комплексым тӱжвачын ош мрамор да гранит дене ковыжлымо, кундемым тӱзатыме.
Торжествош 500 утла еҥым – СВО-н участникше-влакым да нунын ешыштым, изи сарыште кредалше-влакым, ветеран ден мер организацийлан еҥыштым, юнармеец ден кадетлам – ӱжмӧ.
«Шарныктыш тул, чулымлык тул, эл куат тул, курымашлык тул. Таче тиде символ самырык тукымлан пеш кӱлешан. Тышке толын, тудо элнам аралышаш верч вуйыштым пыштыше-влакым палаш да шарнаш тӱҥалеш», – каласен Юрий Зайцев.
Монумент да тудын ончылныжо чӱктымӧ Курымашлык тул воктеке пеледышым пыштыме. Сеҥымаш тул эстафете умбакыже Советский районыш куснен, да тудын корныжо республик мучко шуйнен.
Марий Эл вуйлатышын пресс-службыжын уверже негызеш Юрий Исаков ямдылен.
Снимкыште: Медведевысе шарныктыш монумент ончылно.
Денис Речкинын фотожо.
