Саламлена
Сем тӱнянам пойдаре мастар
Чоныш вочшо семым але мурым колмеке, шукыж годым мурызын мастарлыкшым моктен ойлена. Чынжат уло, вет мурым калык деке мурызо шке йӱкшӧ дене намиен шукта, тыге семыш да мутыш пыштыме образ тудым йоҥгалтарыше гоч почылтеш. Марий профессионал композиторна-влакым ме сайын палена, нуно шукын огытыл, кажныже — калыкнан лывырге кумылжым почын пуышо, марий сем тӱнянам пойдаре мастар.
Иктыже – композитор да дирижёр, Марий Элын сулло артистше, Россий искусствын сулло деятельже, «Виват, маэстро!» тӱнямбал премий, «За заслуги перед Марий Эл» орденын медальже дене палемдалтше Иван Ильич Егоров. Тудлан 22 февральыште 75 ий темын.
Лӱмгече амал дене маэстро нерген – поро мут.
Марий Эл Композитор ушем вуйлатыше, композитор да дирижёр Григорий Архипов:
Иван Ильич Марий Элыштына кумдан палыме айдеме. Тудын композитор, дирижёр да инструменталист-музыкант талантшым театрал да музыкант, семым йӧратыше-влак шукертак кӱкшын аклат.
Эрик Сапаев лӱмеш опер да балет театрыште дирижёрлан ыштымыж годым постановщик семын лу дене спектакльым ямдылен. А художественный вуйлатыше лийме пагатыштыже лӱмлӧ композитор-влак деч марий музыкын эн сай традицийже-влакым налын да ӱшанлын шуен. Тидланат ме таум ойлена.
СССР кӱкшытыштӧ чапланыше композитор Андрей Эшпайын сочиненийже-влакым Иван Ильич Йошкар-Оласе концертлаште дирижироватлен, произведенийлажын премьерже-влакым оркестр дене шоктымым вуйлатен.
Тудо шуко мурылан семым шочыктен. Нуно марий калыкын йӧратыме мурышкыжо савырненыт, мелодизм ден лирикышт дене калык чоныш шыҥеныт.
Данле музыкант да личность Иван Егоров мыйым музыкальный училищын оркестрыштыже ассистент семын пашам ышташ темлен. Ӱжын да ӱшанен. Кужу жап театрыште пырля пашам ыштыме пагатыште тудын деч шукылан тунемынам.
Пагалыме Иван Ильич, тыланда пеҥгыде тазалыкым, кужу ӱмырым да эше шуко у музык сочиненийым возаш тыланем!
Марий Элын сулло артистше, мурызо Татьяна Денисова:
– Иван Ильич дене вашкылна музыкальный театрыште «Родо» группо гыч тӱҥалын. Анатолий Куклин, Марина Родина, Вильсур Хамеев, Родион Егоров… Самырык пагытна пырля эртен.
Музыкышто мыланем эн кугу айдеме – тиде композитор. Иван Егоров ушан-шотан, волгыдо айдеме, тыгаяк кумылан муро-влакым шочыктен: «Лӱҥгалтыш», «Марий ӱдыр», «Олма чевер»… Мыланем тудын гай композитор-влак дене пашам ышташ куан ыле. Иван Егоровын кугешныме койышыжым нигунамат ужын омыл. Тыгаяк улыт Вениамин Захаров ден Сергей Маков. Нунылан – чон гыч лекше эн поро мутем.
Талантан композитор-влак дене пашам ыштымем дене кугешнем. Нунын деч музыкым чон гоч колтен мураш, Иван Ильичын «Ит ончал, ит ончал» гай мурыжо-влак гоч весела лияш тунемынам.
Пиалан айдеме лийынам да улам музык аланыште. Композитор-влак деке корным нигунамат монден омыл, молан манаш гын поэтын чонжо музык гоч почылтеш, а тудым чон гыч композитор лукташ полша. Мурым сценыште йоҥгалтарыме деч ончыч лачак нунын дене чак пашам ыштыман. Мураш тӱҥалше-влаклан тыланыме шуэш: лийза нунын гай мастар-шамыч пелен. Григорий Архиповымат тиде радамыште ужам, музыкшым эскерем…
Иван Ильич, кужу ӱмыран да таза лий, тиде тӱняште эше шуко мурым шочыкто!
С.Пехметова
Фотом И.Егоровын еш альбомжо гыч налме
