Тӱвыра аланыште полышым пуымо шотышто президент фондын 2024 ийысе кокымшо грант конкурсыштыжо Марий Эл гыч вич проект сеҥышыш лектын, возымо Тӱвыра, савыктыш да калык-влакын пашашт шотышто министерствын сайтыштыже.
Тичмаш налмаште республикна 21,7 миллион теҥге грант оксам налшаш.
Фондыш чылаже латик тӱжем йодмаш пурен, тушечын шымле икытше – Марий Эл гыч.
Тӱвыра инициативе президент фондын (ПФКИ) генеральный директоржо Роман Кармановын палемдымыж почеш, тений Российын 89 регионжо гыч икымше гана иктат сеҥышыш лекде кодын огыл. Россий Федерацийын у субъектлаштыже илыше-влакат конкурсыш чолган ушненыт. Мутлан, Запорожский областьыште иканаште кандаш усталык коллективын проектшым ойырен налыныт.
Моско, Санкт-Петербург олала, Удмурт Республик, Белгородский, Нижегородский областьла гыч пурышо проект-влакым поснак сайлан шотленыт. Марий Элыш эн кугу грант (14 миллион наре теҥге) «Опер да балет сценыште шочмо элнан историйже» проектым шукташ колталтеш. Фестиваль жапыште Э.Сапаев лӱмеш, тыгак Беларусь Республик, Татарстан да Донецк гыч опер да балет театр-влак спектакльыштым ончыкташ тӱҥалыт.
Вес грант почеш 3,9 миллион теҥге самырык-влакын «Креатив. контент, искусственный интеллект» медиа-форумыштлан ойыралтын.
2,8 миллион теҥгеаш грант «Человек на войне. БеZ срOка даVности» интерактивный мультимедийный тоштер проектлан колталтеш.
Регионыштына грант полышым тыгак эше районласе тӱвыра учреждений ден коммерческий огыл организаций-влакат налыт.
А.БАЙКОВА
Фотом Э.Сапаев лӱмеш опер да балет
театрын сайтше гыч налме
