Тений 26 апрельыште Марий Элыште кудымшо гана «Сеҥымаш диктант» тӱнямбал кӱкшытан исторический диктант эртаралтын. Кугу Отечественный сарысе событий-влаклан пӧлеклалтше диктантым 6 тӱжем наре еҥ республикысе 500 площадкыште возен. Эртыше кечылаште Марий Эл вуйлатыше Юрий Зайцев тудым ямдылен да эртарен колташ пошышо-влаклан наградым кучыктен.
– «Сеҥымаш диктант» — тиде тыглай мероприятий огыл, Марий Элыште илыше калыкын историий шарнымашыжын кӱлешан ужашыже. «Тудо самырык тукымлан Кугу Отечественный сар, элнан эрыкшым арален кодымо верч кредалше кугезына-влакын подвигышт нерген самырык тукымлан шинчымашым арален да пуэн кодаш йӧным ышта. Историй ден йӱлам арален илыше калыкна диктант гоч шке шинчымашыжым гына огыл терга, тыгак ончыкылык илышлан шке илышыштым пуышо-влакым пагалымашым ончыкта. Самырык-влаклан тӱвыра поянлыкым арален кодымылан ответственностьым шижаш, исторический чынын кӱлешлыкшым умылаш полша. Кӧ историйым монда, тудо шке ончыкылыкшымат огеш уж, – палемден регион вуйлатыше.
Юрий Зайцев площадке организатор-влаклан туаштен да наградым кучыктен. «Сеҥымаш диктант» тӱнямбал исторический диктантын финалистшын дипломжым Руэмысе шуко профилян лицей-интернатын 11-ше классыштыже тунемше Валерия Ятманова налын.
Марий Эл вуйлатышын пресс-службыжын уверже негызеш Светлана Носова ямдылен
