12 апрель — Космонавтике кече
Сандалык кумдыкышто сниматлыме фильм
У ий водын тӱнямбал космический станцийыште сниматлыме «Вызов» фильмын музыкальный клипшым да трейлержым телевидений дене икымше гана ончыктеныт.
Картиныште тӱҥ рольым актриса Юлия Пересильд модын. Фильмыште МКС-ын бортыштыжо тудо космонавтлан келшыдыме вургем дене – кастене чийышаш ужар тӱвыр дене – толын лектеш. Тиде вургем денак тудо Икымше каналыште У ий йӱдым мурым возыктен. Пересильдын вокальный данныйже пеш чапле – тудо Александра Пахмутован «Нежность мурыжым йоҥгалтарен. Муренже Юлия МКС-ыште Мланде деч 400 километр тораште нелытым шиждыме условийыште. Тыгай условийыште клипым ямдылыше оператор семын космонавт Антон Шкаплеров тыршен.
Кино мо нерген?
«Вызов фильмын ужашыжымат МКС-ыште тыгаяк (Млданде деч 400 километр тораште нелытым шиждыме) условийыште сниматленыт. Трейлерыште эреак тыгай шомак йоҥга: «Те тидым нигунам ужын огыдал. Тӱняште космосышто сниматлыме икымше фильм». Фильмын сюжетше почеш торакальный хирург Женя (тудым Пересильд модеш) космосыш чоҥешташ ик тылзе жапыште ямдылалтын шуэш да космонавтын илышыжым арален кодаш МКС-ыш чоҥешта. Космонавт яот сусырген да тудым операцийым ыштыде Мландыш пӧртылташ огеш лий.
Трейлерыште мом ме ужына? МКС-ыште лӱдыкшӧ ситуаций: « Тендан дек шаланыше спутникын пудыргыжо-влак лишемыт! – Ӧрдыжкӧ кораҥшашлан манёврым ыштена…» Перналтме йӱк икмыняр гана шокта. Юлия Пересильдын модмо героиня черле космонавтын кокыралтыме йӱкеш помыжалтеш; тудо «спальник гыч лектеш (тушечак плюш модыш лектын возеш да южышто кечалтеш), МКС мучко чоҥешта, еҥ-влакым помыжалтара да «Служебный модульыш пеш писын кайыза!» манеш. Тыгай лӱдыкшӧ ситуацийыш логалмылан кӧра хирург тыге ойла: «Мландыште операцийым ышташ тӱҥалмемым палышт манын, тушко увертарыза…»
Илышыште тыгайже лийын огыл – Пересильдын героиняже хирургический операцийым ышташ тӱҥалеш: ситуаций пеш неле, шодо икмыняр вере кӱрышталтын… тудлан ит рисковатле манын кӱштен каласат гынат, хирург ответственностьым шке ӱмбакше налеш да неле операцийым ышта. Тидын годым Мландысе тӱҥ кураторжо ой каҥаш дене полшен шога. Тудыжым Владимир Машков модеш. Тудак операцийым ышташ разрешенийым пуа. Машков врачым модеш, тудак космосышто операцийым ыштышашлан тушко чоҥештышаш еҥым ойырен налеш.
Кузе сниматленыт?
«Вызов» фильмыште сниматлалтыныт: Юлия Пересильд, Владимир Машков, Милош Бикович, Олег Новицкий, Антон Шкаплеров, Александр Балуев да икмыняр моло актёр. Мутлан, тӱҥ героинян аважым Елена Валюшкина модеш.
Ончылий шыжым профессионал огыл кок еҥын (актриса Юлия Пересильдын да режиссёр Клим Шипенкон) пеш тыршен ямдылалтмышт деч вара «Союз МС-19 пилотироватлыме корабль съёмкым эртарыше группо дене художественный фильмым икымше гана сниматлаш орбитыш лектын. Нуным станцийыш корабльын командирже космонавт Антон Шкаплеров намиен шуктен. Орбитыште лийме 12 кече жапыште фильмын 40 минуташ ужашыжым сниматленыт, молыжым Мландыште тыглай условийыште ыштен шуктеныт. Пересильд шкенжым шкеак грммироватлен, реквизитланат (вургем, медицине операцийлан кӱлшӧ инструмент) шкеак оза лийын. Шипенко сниматлен, йӱкым тӧрлен шоген, материалын резерв копийжым Мландыш колтеден. Туштыжо художник чия келшен толмым, чыла технический тат шукталтмым терген. Космонавт-влакат картинысе персонаж-влакын рольыштым модыныт.
Трейлерым икымше гана ончыктымо деч ончыч Икымше каналлан пуымо интервьюштыжо «Роскосмос» кугыжаныш корпорацийын гендиректоржо Юрий Борисов тыге каласен: «Фильмым сниматлыме жапыште космосыш чоҥештымашын профессиональный огыл участникше-влакым пеш писын ямдылыме технологий икымше гана терген ончалтын. Тиде пашан чыла ужашыштыже «Роскосмосын» предприятийже, мемнан профильный специалистна-влак Икымше каналын командыжлан чыла семынат полшен шогеныт. Мландыште эртарыме съёмкын пытартыш йыжыҥже «Союз МС-22» корабльын волен шичме жапыште Байконур космодромышто ышталтын. «Роскосмосын» командыже пӱтынь отрасль дене пырля «Вызов» картинын лекмыжым вуча да проектлан сеҥымашке шуаш тылана!»
Актриса Юлия Пересильд 2023 ий 12 апрельыште лийшаш премьерым шӱм вургыж вуча: «Тендан космический фильмда кунам лектеш манын чылан йодыштыт. Ӱшаныза, тидыжым мемнан деч эн чотшо нигӧ огеш вучо. Тиде – кум ияш пашанан саскаже, мемнан йӧратымашна, тудым ямдылаш тынар шуко вийым пыштыме, чыла лӱдыкшым сеҥен лекташ кӱлын, тынар тургыжланыме. Мый веле огыл, Клим, пӱтынь командына, икшывына ден ача-авана-шамыч тургыжланеныт. Мемнан модмо фильмым вучыза!»
Технике велым аклымаште сниматлаш йӧсӧ лийын. Молан манаш гын актрисылан тарванылаш куштылго лийын огыл, космос условийыште тидым ышташ тунемаш кӱлын. Технике велым ончалмаште оҥай тат-влакат лийыныт: кажне нылле минут гыч МКС-ыште пычкемшалтын, а вараже уэш волгыдемын. Кече тушто шонанпыл семынак тӱрлӧ тус дене волгалтара. Ончышо-влак тидым картиныште ужын кертыт: Пересильдын героиняже иллюминатор воктене шинча да Мланде дене мутлана. Тиде татыште Кече вашталтеш да юзо сынан космический волгагтмаш чӱкталтеш.
Интернетысе материал негызеш Павел Шакиров ямдылен
Фотом интернет гыч налме
