24-29 октябрьыште Йошкар-Олаште Российысе ТЮЗ-влакын «Йоча да самырык-влаклан – тачысе илышлан келшыше драматургий» фестивальышт эртаралтеш.
Куд кече жапыште Йошкар-Олаште илыше да унала толшо-влаклан Уфа (кок коллектив, иктыже башкир йылме дене ончыкта), Пенза областьысе Заречный, Чебоксар, Калуга, Киров олала гыч толшо самырык театр-влакын мастарлыкыштым ончаш йӧн лиеш. Марий самырык театр «Эти свободные бабочки» спектакльым темла.
Фестивальыш лукмо паша-влакым жюри аклаш тӱҥалеш. Сеҥыше-влакым лу номинацийыште палемдат.
– Фестиваль лабораторий сынан лиеш. Тушко критик-влак дене пырля студент-шамычат толыт. Жюрим Ольга Игоревна Галахова вуйлаташ тӱҥалеш. Тудо «Йошкар-Ола театральная» фестивальыштат ятыр гана критик радамыште лийын. Тыгак жюриште ГИТИС-ын педагогшо, театровед Екатерина Сергеевна Кострикова, Санкт-Петербург гыч Российысе сцене искусство институтын доцентше, театровед Татьяна Сергеевна Ткач лийыт, – палемдыш журналист-влаклан эртарыме пресс-конференцийыште Марий самырык театрын художественный режиссёржо Олег Иркабаев.
Фестивальын участникше-влаклан тӱрлӧ мастер-класс, «йыргешке ӱстел» йыр мутланымаш, лекций-влак да Йошкар-Олана мучко экскурсий эртаралтыт.
Ушештарена, 2020 ийыште икымше фестивальыште мемнан артист-влак «Про Федота стрельца, удалого молодца» спектакльым ончыктеныт. Рольым мастарын чоҥымыжлан актёр Александр Кожевников «Эн сай пӧръеҥ роль» номинацийыште палемдалтын. А гран-прим Рязань областьысе самырык-влакын «На Соборной» театрышт «Господа Головлёвы. Маменька» спектакль дене налын.
А.БАЙКОВА
