Шукерте огыл Саранск олаште «Лидерстве национальный школ» Россий кӱкшытан форум лийын. Тудын кышкарышкыже финно-угор ешыш пурышо чыла калыкын тӱвыра ден йӱлажым аралаш ӱжшӧ ятыр мероприятий пурталтын. 26 регион гыч мийыше 200 участник радамыште кундемна гыч 9 еҥан делегаций лийынна.
Нунын коклаште Морко кундем дечын делегат лияш мыланемат пиал шыргыжалын. А делегатланже мыйым Марий Эл Образований да науко ден Тӱвыра, савыктыш да калык паша министерстве-влак темленыт. Нунылан таум каласем.
Каласыман, форумыш ушнаш манын, кажне участник конкурсым эртен. Тудын дене келшышын шочмо да руш йылмыла дене посна номинацийыште эссем возаш кӱлын.
Форумым Россий Федерацийын сенаторжо, Финно-угор калык-влакын ассоциацийыштым вуйлатыше Пётр Николаевич Тултаев почын. Пленарный заседанийыште финн-угор ешыш пурышо кажне йылмын вияҥме ойыртемже нерген докладым колыштмо. Умбакыже спикер-шамыч мастер-классым, семинарым эртареныт. Чылажат делегат-влаклан этнокультур сферым умбакыже вияҥдаш у шӱлышым, вий-куатым пуртен.
Мом шылташ, кызытсе самырык тукым шочмо йылмыжлан пешыже шӱман огыл. Утларакшым рушла, англичанла тунемаш тыршат да тыге, мыйын шонымаште, ончыкылык карьерышт нерген шонат. Но шочмо йылме деч посна ме нужна лийына. Форумышто йылме нерген тургыжландарыше йодышлан кугу тӱткыш ойыралтын. Мероприятийын тӱҥ шонымашыже – тӱрлӧ йылме дене кутырышо калыкын лидерышт (ончылъеҥышт) кажныже форумын чыла йыжыҥлаж гоч эртышаш да шочмо кундемыштыже шке йырже чолга ӱдыр-рвезе-влакым чумырышаш.
Форум мучашлалтме годым эксперт-влак темленыт: айдеме финн, эстон, карел, удмурт але марий лийже, но тудым ончыко вӱден шогышо самырык лидер лиеш гын веле шочмо йылмына нигунам огеш йом.
Ме, Марий Эл чапшым аралыше делегаций, марий шӱлышнам почын ончыкташак тыршышна (снимкыште). Кристина Краснова ден Данила Коротков эре марий мурым йоҥгалтареныт, Никита Козловын гармонь йӱкшӧ почеш 200 еҥ мурен куштен. Мария Акулован чаткан тавалтен колтымыжым кажныжат куанен ончен, Александр Ямбаевын лыжга марий йылме дене пелештен колтымыжо шочмо мландын чын патриотшо улмым раш почын ончыктен. Анастасия Муравьева ден Максим Алгайкин гын мемнам туштат эре ончыко вӱденыт.
А мыйже тыгай чолга, марий шӱлышан самырык тукым коклашке логалмемлан кузе куаненам! Форум кужу жап лийын огыл гынат, чылт ик еш гайыш савырнен шуктенна. Нине чолга ӱдыр-рвезе-влаклан тыге каласем: тендан дене моткочак кугешнем! Ончыкыжат тыгаяк кумылзак, икте-весе верч тургыжланыше, жапыштыже полыш кидым шуялтен моштышо лийза. А эн тӱҥжӧ: тек марий шӱлышда утларак да утларак вияҥеш.
«Лидерстве национальный школ» умбакыже шуйна, тений сентябрьыште тудо Москваште тӱнямбал кӱкшытыштӧ эрташ тӱҥалеш.
Елена Григорьева,
форумын Морко кундем деч делегатше.
М.Алгайкинын соцкылысе лаштыкысе видео гыч налме скриншот.
