20-28 октябрьыште, ӱмыр лугыч лийше мурызо Артур Ефремовым шарналтен, Советский районышто тыгай лӱман самодеятельный автор ден мурызо-влакын фестивальышт лиеш.
Тушко 35 ияш марте мурызо-влак ушнен кертыт. Кум номинаций палемдалтын: «Гармонетым налын шокталтем» – гармоньым шоктен мурышо-влаклан, «Эркын-эркын ӧндалам» – гитарым шоктен мурышо-влаклан да «Мый муралтем – тый кушталте» – автор испонитель-влаклан (фонограмма-минус). Организатор-влак сай тӱҥ приз-влакым ямдыленыт: шуйский гармоньым, электро-гитарым, акустический системым.
Тыгай мероприятийым илышыш шыҥдараш тудын йолташыже-влак, «Чоным почын мурена» проектын участникше-влак, темленыт да чыла призым концертлаште ыштен налме окса дене налыныт. Ямдылалташ тӱҥалза веле, йолташ-влак!
С.Носова
