Я.Эшпай лÿмеш Марий кугыжаныш филармонийыште Медицине сестран тÿнямбал кечыжлан пöлеклалтше торжественный мероприятий эртен.
– Коронавирус инфекцийын пандемийжылан кöра профессиональный пайремдам – Медицине сестран тÿнямбал кечыжым – кок ий кумдан палемден ышна керт, – пайремым почмо годым манын Марий Элын тазалык аралтыш министрже Марина Панькова. – Сандене таче тиде мотор залыште чолгыжшо шинчадам, поро чурийвылышдам поснак куанен ончем. Эртыше кок ий республикнан кокла звеножын специалистше-влакын жапын йодмыжлан кÿлын вашештымыштым веле огыл, тыгак нунын тымарте уждымо инфекций дене шкем чаманыде да лÿддымын кучедалмыштым ончыктыш. Простажак огыл условийыште профессиональный порысдам честно да поро шÿм-чон дене шуктымыланда тау!
М.Панькова тазалык аралтыш аланыште суапым налмылан да пашам шуко ий тыршен ыштымылан Йошкар-Оласе йоча больницын кугурак медсестраже Д.Соловьевалан Марий Эл правительствын Чап кагазшым да Перинатальный рÿдерын азам ыштыме отделенийжын акушеркыже И.Хаснутдиновалан Марий Элым вуйлатышын Таумутшым кучыктен.
Минздравын Чап кагазше дене «Кокла медицине да фармацевт шинчымашан эн сай специалист» всероссийский конкурсын регионысо йыжыҥыштыже сеҥыше-шамычат палемдалтыныт:
— «Эн сай акушер» номинацийыште – Перинатальный рÿдерын азам ыштыме отделенийжын акушеркыже Е.Балыбердина;
— «Эн сай кугурак медицине сестра» номинацийыше – Йошкар-Оласе больницын инфекционный отделенийжын медицине сестраже С.Рахматуллина;
— «Эн сай медицине сестра» номинацийыште – Республиканский онкодиспансерын радиологический отделенийжын медсестраже И.Кулагина.
Должностной обязанностьым сайын шуктымылан Тазалык аралтыш министерствын Чап кагазше дене Республиканский коваште-венерологический диспансерын медсестраже Л.Васильевам, Медведево районысо Азаново врачебный амбулаторийын паллиативный полышым пуымо отделенийжын медсестраже Л.Рябининам, Медведево районысо рÿдö больницын Акашево врачебный амбулаторийжын медсестраже Т.Топкарцевам, Советский районысо рÿдö больницын Алексеевский врачебный амбулаторийжын медсестраже Л.Савельевам палемденыт.
Оршанке районысо рÿдö больницын медсестраже В.Кучеровалан, Йошкар-Оласе медицине колледжын методистше Е.Поповалан, Йошкар-Оласе йоча эмлымверын тÿҥ медсестраже Н.Абрамчиклан, Марий Турек районысо рÿдö больницын тÿҥ медсестраже М.Погудиналан, Шернур районысо рÿдö эмлымверын тÿҥ медсестраже Л.Балицкаялан, Республиканский онкодиспансерын 1-ше №-ан радиотерапевтический отделенийжын кугурак медсестраже Л.Хохловалан, 1-ше №-ан медсанчастьын поликлиникыжын кугурак медсестраже Т.Ендальцевалан, Йошкар-Оласе йоча эмлымверын физиотерапевтический отделенийжын медсестраже М.Филоновалан «За верность профессии» почётан знакым кучыктеныт.
Пайрем филармонийын артистше-влакын кугу концертышт дене мучашлалтын.
М.ИВАНОВА
Фотом Марий Элын Тазалык аралтыш министерствыжын сайтше гыч налме
