Марий Элын МВД-жын Киберпреступлений дене кучедалме шотышто отделжын пашаеҥже-влак оперативно-кычалме мероприятийым эртарымышт годым Йошкар-Олаште илыше 32 ияш ӱдырамашым кученыт.

Пален налмышт почеш, ӱдырамаш ик сото кыл салонышто пашам ыштен. Телефон операторын данный-влак базышкыже пураш да тудын дене пайдаланаш йӧнжӧ лийынат, тидым осал пашалан кучылтын. Планым эртарен темымылан кугурак пашадарым налаш манын, тудо сим-карте-влакым кум гана уэш-пачаш луктеден. Тыгодым абонент-шамычым шижтарен оыгыл. Да нунышт тыге ыштен кертме нерген шоналтенат огытыл!

Тиде ӱдырамаш шотышто уголовный делам тарватыме. Шымлымаш ден тергымаш умбакыже шуйнат.

Л.Камалетдинова

Авторын фотожо