7 – 8 июльышто Кудымкар оласе Коми-Пермяцкий этнокультур рӱдерыште «Ловлӧн бикыв» («Чон тулсалым») V финн-угор сылнымут фестиваль эртаралтын. Тушко Марий Эл гыч делегаций миен.
–Нунын ик кугу пайрем годым 3-4 фестиваль иканаште эртаралтеш, тений сылнымутчо-влакым Олан кечыже кышкарыште чумыреныт. Финн-угор регион-влак кокла гыч Марий Эл да Удмуртий гыч веле лийыныт. Литератор-влак йыргешке ӱстел йыр «Национальный литературым руш йылмыш кусарымаш – Российын национальный поянлыкшым арален кодымо йӧн» йодышым каҥашеныт. Литературовед, кусарыше, А.М.Горький лӱмеш Литературный институтын художественный кусарымаш кафедржын доцентше, филологий науко кандидат Вера Григорьевна Пантелеева кок келге докладым ыштен, нуно утларакшым кусараш тӱҥалше самырык автор-влакым туныктымаш семын лийын. Удмуртий Республикын писатель ушем вуйлатышыже Петр Захаров шке кундемыштышт лекше газет да журнал, книга-влак дене палдарен. «Марий Эл» савыктыш пӧрт» ГАУ-н директоржо Эдуард Иманаев мемнан республикыште печать изданий, книга-влакым лукмо паша нерген каласкален, – палдарыш Геннадий Григорьев.
Тудо шкеже Коми-Пермяцкий округышто эртаралтше ты фестивальыш нылымше гана миен. «Кугарня» газет редакцийын эртарыме «Какшан сер ӱмбалне» фестивальын сеҥышыже Дмитрий Афанасьев ден Алена Яковлева дене пырля И.Я.Кривощёков лӱмеш ола паркыште родо-тукым коми калыкым марий муро дене куандарен.
Л.СЕМЕНОВА
А.Яковлеван фотожо
