«МАРИЙ ЭЛ» ТАЧЕ

Сай полыш лиеш

Россий Правительстве агротуризмлан вияҥаш грант дене полшаш тӱҥалеш.

Эн кугу грант 10 миллион теҥгеш шуэш. Кугыжанышын окса полышыжым изи аграрный бизнесыште тыршыше-влак налын кертыт. Проект-влак ялысе туризмым вияҥдаш виктаралште лийшаш улыт. Тудо турист-влакым вашлияш да вераҥдаш келштарыме объект-влакым чоҥымо да воктенысе кумдыкым тӱзатыме, кумылым нӧлтымӧ инфраструктурым ыштыме, турист оборудованийым, снаряженийым, инвентарьым налме дене кылдалтшаш.

Ончылгоч палемдыме почеш, кажне проект вич ий жапыште шкенжым  сулышаш. Тудын ик ужашыжлан предприниматель шкенжын шивуйндыжымат кучылтшаш. Мутлан, 3 миллион теҥгеш грантым налаш тудо 10 процентшым, 5 миллион теҥгеашлан 15 процентшым, 8 милллион мартелан 20 процентшым, 10 миллионашлан 25 процент деч шагал огыл оксам луктын пыштышаш.

Проект-вылакым Ялозанлык да продовольствий министерстве ойыраш тӱҥалеш. Вес ийын тыгай грант-влакым ойыраш  федерал бюджет гыч чылаже 300 миллион, 2023 ийыште 500 миллион да 2024 ийыште  700 миллион теҥгем ойырат.

 С.Носова

 

Опубликовать в Одноклассники

Добавить комментарий