Марий Эл - 100

Сай пашалан – кӱкшӧ ак

Историй шанче кандидат Никандр Семёнович Поповым Марий Эл вуйлатыше А. Евстифеев «За заслуги перед Марий Эл» орденын медальже дене палемден.

 Никандр Попов «Марий Эл» газетнанат поро йолташыже,  кажне номернам лудын шога, ятыр гана шанче статьяже-влак, шонымашыже савыкталтыныт. Тудо 1950 ий 12 февральыште Параньга район Памашъялыште шочын. Кызыт В.М.Васильев лӱмеш Йылмым, сылнымутым,  историйым научнын шымлыме марий институтын кугурак шанче пашаеҥже. Ынде 40 ий утла марий да финн-угор калык-влакын историй ден тӱвыражым, этнографийжым кыртмен шымла. Шке жапыште марий юмыйӱлам, кундемыштына христианизаций кузе шыҥдаралтмым шымлыме пашаланат кугу верым ойырен. Этнографий экспедицийлам чӱчкыдын эртара, республикысе, Российысе да тӱнямбал проектлашке эреак ушна. Тудо 260 наре шанче, публицистике да тунемме-методике пашам савыктен. МарНИИЯЛИ-н коллектившын лукмо да «Идалыкын книгаже» семын палемдалтше  «Марийцы. Историко-этнографические очерки» книган ик авторжо семын палыме.

         Никандр Семенович марий мер илышыштат эре чолга. Шке жапыштыже «Марий ушем» организацийымат вуйлатен. Кызыт тудо марий мер толкынлан вияҥаш полшышо эксперт семынат акым да каҥашым пуэн кертеш.

С.Носова

Снимкыште: Н.С.Попов.

Опубликовать в Одноклассники

Добавить комментарий