Марий Элыште тений икымше пелийыште 179 тӱжем тонн шылым ыштен налме, 97 тӱжем тонн шӧрым лӱштымӧ.
Ялозанлык да кочкыш сату министерстве гыч пурышо увер почеш, вольык озанлыкна икшырымын вияҥеш, тылзе гыч тылзыш ошкылым ышта. Чумыр ялозанлык продукций гыч шымле процентше вольык сатулан логалеш, сандене тиде отрасль поснак кугу тӱткышым йодеш. Тыге тений икымше пелийыште шылым кодшо ийысе нарак ыштен налме, шӧрым шым процентлан шукырак лӱштымӧ. Кажне ушкаллан шотлымаште кодшо ийысе дене таҥастарымаште 161 килограммлан, але кум процентлан шукырак, лӱштымӧ.
Чумыр шыл гыч 73 процентшым сурткайык продукций налын. Тыште чумыр гаяк надыр – «Акашевский» сурткайык фабрике» ООО-н. Тудо тиде кечылаште почылтмыжлан коло ияш лӱмгечыжым палемда. Пӱтынь сӧсна шыл гыч 25 процентшым «Звениговский» СПК ден «Шойбулакский» АО ямдыленыт. Моло кок процентше ушкал шыллан логалеш.
Тӱкан шолдыра вольык шагалеммым 2020 ийыште чарен шогалтыме. Кызыт ушкал, мутлан, тӱшка ден фермер озанлыклаште 20,3 тӱжем вуй шотлалтеш, тидыже кодшо ийысе дене таҥастарымаште кандашшӱдӧ утла вуйлан шукырак. Кугыжаныш полышат вольыкым ешараш полшен. Мутлан, шӧр озанлыклан бюджет гыч тений икымше пелийыште 187 миллион теҥгем ойырымо. Урлыкым саемдыме паша вияҥеш, тений 185 вуй сай урлык тӱкан шолдыра вольыкым налме.
Кургым ямдылыме тургым ик арнялан ондакрак тӱҥалын. Чоштыра да нӧрӧ кургым тиде гана 588 тӱжем тонным шапашлаш палемдыме гын, кызыт марте тышечын пелыже утлам ямдылыме.
Снимкыште: Морко районысо «Передовик» ялозанлык артельын вольыкшо ару да эре темше шога.
Вячеслав Смоленцевын фотожо.
