Марий Элын медицине организацийлаштыже маскым чийыме пеҥгыде режимым да тӱрлӧ чаракым пуртымо.
Российыште грипп эпидемий вийым налеш. Эксперт-влакын палемдымышт почеш, тыгайже элыштына ынде ныл ий лийын огыл. Ты гана пеш шучко H1N1 штамм (сӧсна грипп) чот шарла. Черланымым вирусын авалтымыж деч вара кок шагат гычак шижаш лиеш. Пеш нелын эртыше чер тазалыклан кугу зияным ыштымыж дене лӱдыкшӧ. Лачшымак тудо 2009 ийыште тӱжем дене еҥын илышыжым налын. Марий Элыштат черланен колышо-влак лийыныт. Коклашкышт мӱшкыран ӱдырамаш-шамычат логалыныт. Теният грипп деч колымо икмыняр случайым уже регистрироватлыме.
Тиде жапыштак у коронавирус инфекций дене черланыме чот кугемеш, ты шотыштак – ик ияш марте йоча-влак коклаште.
– Таче айдемын грипп але ковид дене черланымыжым чын рашемдаш кӱлешан, молан манаш гын нуным эмлыме йӧн тӱрлӧ, – манеш регионын тазалык аралтыш министрже Марина Панькова. – Грипп да у коронавирус инфекций дене черланыше-влакым кызыт Йошкар-Оласе городской больницын инфекционный отделенийышкыже эмлалташ пыштат, моло инфекциян пациент-шамычым – Советский районысо рӱдӧ больницыш. Чыла медицине организацийыште чараклыме мероприятий-влак ден маскым чийыме режимым пуртымо. Тидыже инфекцийын стационарлашке логалмыж деч ышталтеш. Поликлиникылаште толшо-шамычын капкыл температурыштым угыч висаш тӱҥалыт.
Пытартыш вич эпидсезонышто тидыже эн виян, иканаште тынар шуко еҥ эше черланен огыл. Черланыме да стационарыш пыштыме сӱретым ончалаш гын, 2019 ийыште тудо февраль кыдалне эн шучко лийын. 2020 ийыштат эн шуко еҥ тиде жапыште черланен, но тылеч ончычсо ийысыжлак огыл. 2020-2021 ийлаште грипп шотышто сезон лийынжат огыл манаш лиеш, а 2021-2022 ийлаште тудо ончычсо кугытшо дене да ӱмаште декабрьыштак пӧртылын. Кызытсе сезон 48-ше арняштак эн кугу кӱкшытыш шуын: ӱмашсе да ковид деч ончычсо сезонла дене таҥастарымаште черланыше-влак кум пачаш шукын улыт.
Марий Элыште грипп дене черланыме чот лишыл 1,5-2 арня жапыште палынак кугемшаш. Сандене шкем эше вакцинаций полшымо дене аралаш йӧн уло, маныт республикнан Тазалык аралтыш министерствыштыже.
М.ИВАНОВА
Фотом Интернет гыч налме
