Россий Общественный палатын членже Роман Золотухин сайлымашым эскерыме шотышто федеральный ситуационный рӱдер гыч вияш трансляцийыш эртарен.
Марий Элыште Мер эскерымаш штабым вуйлатышын алмаштышыже Роман Золотухин республикыште, тидын шотыштак петырыме учрежденийлаште, йӱклымашым кузе организоватлыме нерген каласкален.
Россий Общественный палате пеленысе Ситуационный рӱдерын пашаж дене келшышын, 18-20 сентябрьыште регионла гыч эскерыше‑влак дене вияш эфир ден пресс-брифинг-влак эртат.
Вияш эфирыш лекме деч ончыч Роман Владимирович Марий Элысе 1-ше № — ан СИЗО-што верланыше избирательный участкыште эскерыше семын лийын.
СИЗО-што сайлымаш закон почеш эртен. Участкыште 148 сайлыше шотлалтеш, 10 шагат эрлан 90 еҥ йӱклен. Эскерышылан посна верым ойырымо, а пӱтынь процессым нормо дене келшышын организоватлыме.
Йӱклымӧ механизм шкежат стандартан деч огеш ойыртемалт. Еҥ-влак кабинкыш пурат, бюллетеньым налыт да шке йӱкыштым келшыше партийлан да депутатлан пуат. Сайлыше-влакын паспортышт учрежденийын администрацийыштыже аралалтеш, сандене тудым лӱмын процедур жаплан пуат. Айдеме йӱкла да документым пӧртылта.
Роман Золотухин СИЗО-со участкыште Ульяновск область гыч ик еҥын йӱклымыж нерген палемден каласен. Тудлан шке кундемысе кандидат-влак верч йӱкым пуаш йӧным ыштеныт.
Эфирыште йоҥгалтарыме данный почеш, Марий Элыште чыла сайлыме участке жапыштыже почылтын, йӱклымаш штатный режим дене кая.
— Сайлышына-влаклан нимогай лӱдыкшӧ уке. Еҥ-влак йӱклат, нимогай лӱдмаш уке, йӱклаш кумыл гына уло. Калыкын задачыже — шке праваж дене пайдаланаш, — палемден Роман Золотухин.




