Шукерте огыл Москваште Верысе самоуправлений вияҥмашын всероссийский ассоциацийжын VI погынжо эртен. Тушко элнан 89 субьектше гыч делегат-влак миеныт. Марий Эл гычат лийыныт. Иктыже – Параньга муниципал район вуйлатыше, верысе депутат-влак погынымашын председательже Любовь Михеева.
Мероприятийыште муниципалитет вуйлатыше, регионласе муниципал образований советын еҥже-влак эсперт-шамыч дене пырля верысе кучем орган-влакын показательыштын пайдылыкше дене кылдалтше, муниципал службылан кадрым ямдылыме, граждан-влак дене интернет гоч пашам ыштыме йодыш-влакым каҥашеныт.
Ятыр ий верысе самоуправлений пашаште тыршыше марий ӱдырамашлан погынышто Россий президентын Тауштымашыжым кучыктеныт.
«Вучыдымо, но мотокоч куанле лийын», – каласыш пӧртылмекыже Любовь Леонидовна. Тудым Параньга районысо депутат-влак радамыш эше 2004 ийыштак сайленыт да вуйлаташ темленыт. Но ӱдырамаш вигак келшен огыл, Кугу Пумарий школ директорын пашажым ынеж кай улмаш. Варажым тудым ты пашаш шогалашак йодыныт. Ынде коло ий наре мунициал службышто тырша. Тыгак Мер Каҥашын, Марий калык конгрессын чолга еҥже. «За заслуги перед Марий Эл» кокымшо степенян орден, тыгаяк лӱман орденын медальже денат палемдалтын. Кужу жап школышто пашам ыштымыжым «Калык просвещенийын отличникше», «Марий Элын сулло туныктышыжо» чап лӱм-влак денат акленыт.
А лишыл жапыште Любовь Михеева проект паша дене кылдалтше Пятигорскышто эртышашлык погынымашке кайышаш. Шкенжын районыштыжо ты паша эше начаррак кая гынат, верысе кучем вуйлатыше-влакым тудо ок шылтале. «Нунын ӱмбалне паша моткоч шуко, огыт шукто», – ойла тудо.
С.Носова
Снимкыште: Л.Михеевалан Тауштымашым РФ Президентын Элкӧргӧ политике управленийжым вуйлатышын алмаштышыже Е.Грачев кучыктен.
Фотом Л.Михееван еш альбомжо гыч налме.
.
