Регион вуйлатыше Юрий Зайцев Россий Федерацийын национальный гвардийжын войскаже-влакын федеральный службыжын Марий Элысе управленийжын вуйлатышыж ден личный составшым профессионал пайремышт дене саламлен. Торжественный мероприятий Марий самырык театрыште эртен.
– Еҥ-влаклан лӱдыкшыдымылыкым ыштымаште, общественный порядкым эскерымаште, кӱлешан кугыжаныш объект-влакым аралымаште, терроризм да экстремизм ваштареш кучедалмаште национальный гвардий – ончыл радамыште. Специальный военный операций тӱҥалме икымше кечыла гычак тудо служебно-боевой задаче-влакым шукта. СВО-што лийме жапыште Марий Элысе Росгвардийын 60 утла военнослужащийже ден пашаеҥже кугыжаныш награде дене, 180 утла еҥ ведомствын наградыж дене палемдалтыныт, – палемден Юрий Зайцев.
Россий Федерацийын президентше Владимир Путин погынышо офицер ден ветеран-влакым видео дене саламлен.
– Правопорядкым аралымаште да еҥ-влаклан лӱдыкшыдымылыкым ыштымаште Росгвардийын надырже моткоч кугу, – каласен элым вуйлатыше.
Мероприятий тӱҥалме деч ончыч Юрий Зайцев ден Росгвардийын Марий Элысе управленийжын начальникше Александр Голуб выставкым ончен савырненыт. Тушто специальный да военный технике, бронезащите средства ден вооружений-влак лийыныт.
Тиде мероприятийыштак регион вуйлатыше ойыртемалтше пашаеҥ-влаклан наградым кучыктен.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
