Йошкар-Оласе Чарла кремльыште 4 ноябрьыште Калык-влакын икоян улмышт да Республикнан кечыжлан пӧлеклалтше ялозанлык ярмиҥга лиеш.
Тиде гана оласе калыклан, тыгак уна-влаклан киндым да кинде кочкышым, шылым, шӧрым, нуным кучылтын ямдылыме продукцийым, мӱйым, мӱкшын пуымо моло продукцийым, пакчасаскам, пареҥгым, фруктым, чодыра поянлыкым, муным, колым, тыгак кидмастар-влакын сатуштым, сувенирым ужалаш тӱҥалыт.
Марий, татар, руш тӱвыра рӱдер, тыгак артист, куштышо да мурышо коллектив-влак пайрем концертым ончыктат, ончаш да сатум налаш толшо-шамычым куандарат. Ярмиҥга 9 гыч 15 шагат марте эрта. Сатум ужалаш толшо-влак йодмашым ончылгоч пуышаш улыт, нуным Кремльыш 8 гыч 9 шагат марте пуртат.
Вячеслав Смоленцев.
Авторын фотожо.
