4 июньышто Марий Эл вуйлатышын обязанностьшым жаплан шуктышо Юрий Зайцев канде кава йымалне «Раймонда» (А.Глазунов) балетым ончен.
Тиде спектакль дене Э.Сапаев лӱмеш опер да балет академический театр «Кеҥеж тургым» фестивальжым почын.
Ты кечын Шереметев замке кумдыкышто калык моткоч шуко погынен. Туштак эше «Гуманим в Марий Эл» кочкыш фестиваль эртен. Тыгайже Юл кундемыште икымше гана лийын. Тушко Марий Элыште илыше-влак веле огыл, Чуваш, Татарстан республикла, Нижегородский область гычат уна-влак ятыр погыненыт.
Балет деч ончыч Юрий Зайцев ярмиҥгам ончен савырнен, фермер-шамыч дене вашлийын мутланен, тӱрлӧ сырым тамлен да верыште ыштен лукмо кочкыш сатум наледен.
«Мемнан республикыште ялозанлык предприятий-влакын тӱрлӧ кочкыш сатум лукмыштлан моткоч ӧрынам. Марий Элысе фермер-влак элнан рынкыштыже веле огыл, лишыл йот элласышкат темлен кертыт манын ӱшанем, – палемден Ю.Зайцев.
Марий Эл вуйлатышын обязанностьшым жаплан шуктышо Шереметев замкым, зал-влакым, усадьбе йырысе кумдыкым ончен савырнен.
Юрий Зайцевлан замкын историйжым, турист-влак дене пашам ыштыме программе нерген каласкаленыт. Юриныш турист-шамыч шукырак толышт манын, пытартыш жапыште шуко ыштыме. Ий еда замкыш автобус але изирак теплоход дене Нижний Новгород, Казань, Киров, Чебоксар да Йошкар-Ола гыч 26 тӱжем утла турист ден экскурсант толеш.
Турист-влаклан тыште чыла шотыштат йӧнан лийже манын, эҥерла дене маршрутым почыныт, корным ачалат.
Юрий Зайцев балет артист-влакын мастарлыкыштым кӱкшын аклен.
Мучашлан Марий Эл вуйлатышын обязанностьшым жаплан шуктышо Ю.Зайцев деч нунылан пеледыш аршаш лийын.
Марий Эл Республикым Вуйлатышын
организаций да аналитике виктемжын
уверже негызеш А.БАЙКОВА ямдылен.
