Фотолаштык
Михаил СКОБЕЛЕВ,
Лидия ШАБДАРОВА
Рӱдолана кеч-могай пагытыштат сылне
Йошкар-Ола кажне кечын утыр сылнештеш, у тӱсым налеш. Тений ятыр кумдыклан вес сыным пуртымо, шуко пушеҥгым шындыме. Ӱшанена, рӱдолана ожно годымсо ик эн ужар ола манме лӱмжым шканже уэш пӧртылта.
Исторический памятниклан шотлалтше оралте-влакым шотыш кондат. Мутлан, Изи Какшан эҥер серыште шинчыше пӧрт уэмдалтеш, тушто марий классик, писатель Сергей Чавайн илен. Йошкар-Оласе тӱвыра да каныме рӱдӧ паркат у сыным налеш. Шошым ола уремлаште ятыр олмапум, пистым шынденыт. А Марий паркым туя ден канде кож-влак сылнештарат.
Кугу Отечественный сарыште сеҥымылан 80 ий темме лӱмеш Йошкар-Олам ойыртемалтшын сӧрастареныт. Рӱдӧ паркыште, Дева Мариян площадьыштыже, Ната Бабушкинан скверыштыже, моло вереат йошкар шӱдыр-влакым вераҥденыт. 2015 ийыште Кугу Сеҥымашын 70 ияш лӱмгечыж вашеш В.И.Ленин лӱмеш тӱвыра полат воктене шындыме сирень аллей таче кечын моткоч моторын коеш.
Оболенский-Ноготков площадьыштат вашталтыш шижалтеш. Шукерте огыл тушто йӧнан у теҥгыл-влакым шындылыныт. Но тидын годымак шӱлыкан сӱретат коеш. Теве Воскресенский паркыште пушеҥге-влак, Ленин лӱмеш площадьыште кож-шамыч кошкат. Каласыман, мэрий ден рӱдоласе администрацийыште тиде экшык нерген палат да лишыл жапыште чылажымат шотыш кондаш сӧрат.
Йошкар-Ола вашталтеш, кушкеш, у сыным налеш, мемнам моторлыкшо дене куандара.
Михаил Скобелевын фотожо
