Келшымаш кыл
Пырля ыштет – ушнен толеш
Марий Эл вуйлатыше Юрий Зайцев ден Ленинград областьын губернаторжо Александр Дрозденко пашам пырля ыштымашым кумдаҥдыме шотышто соглашениеш кидпалым пыштеныт.
Тидыже Ленинград областьым ыштыме кечым палемдыме дене келшен толын, сандене Юрий Зайцев эн ончычак ты событий дене саламлен. Пырля шуктен толмо проектла нерген палемдышыжла, тиде кылым умбакыже келгемдымылан ӱшаным луктын каласен.
Регион вуйлатыше-влак бизнеслан йӧным ыштыме, вашла торгайыме, пушеҥгым обрабатыватлымаште да вольык урлыкым саемдымаште опыт дене палдарыме, туризм ден тӱвыра кылым вияҥдыме шотышто могай йӧн улмым каҥашеныт. Касвелым санкций условийыште регион-влак дене пашам пырля ыштыме поснак кӱлешан, палемден Александр Дрозденко.
Шукталтше проект-влак коклаште Нева воктене Шарнымаш да Чап интернациональный аллейыште Кугу Отечественный сар годым Марий Элын шочшыжо-влакын подвигыштлан пӧлеклалтше стелым шогалтымым, регион-влак кокласе «Сеҥымаш кӱсле» тӱвыра-патриот проект почеш паша ышталтмым ончыкташ лиеш.
х х х
Санкт-Петербургышто паша дене коштын савырнышыжла, Марий Эл вуйлатыше Юрий Зайцев Санкт-Петербургын губернаторжо Александр Беглов дене вашлийын.
Нуно Петербургысо тӱнямбал экономике форумышто субъект-влакын вуйлатышышт коклаште кидпалым пыштыме соглашенийым шуктен толмо нерген йодышым онченыт. Соглашений партнёр кылым вияҥдаш ешартыш йӧным пуа, палемден Юрий Зайцев. Александр Беглов тидым шуктен толаш лишыл жапыште Корно картым ямдылаш да соглашенийыш ешарен пурташ темлен.
Губернаторын ойлымыж почеш, регион-влак коклаште кыл кучымо у йӧным машиностроений сферыште муаш лиеш. Тудак Марий Элын экономике да инвестицийым савырыме куатше дене йӱлаш пурышо Изи да кокла кугытан бизнес партнериат площадкыште палдараш темлен. Тудо Петербургышто октябрьыште эртаралтеш. Тений тудо региональный да национальный бренд-влаклан пӧлеклалтеш.
Вашлиймаште тыгак Марий Эл Республикын Санкт-Петербургышто да Ленинград областьыште постоянный представительствыжын пашажым лончыленыт. Марий Эл вуйлатыше палемден: республикын представительствыже шкенжым келгын палыше мер орган семын ончыктен, йырже марий землячествын чолга еҥже-влакым чумырен да калыкле-тӱвыра пашам ик корно дене виктарен колташ, кучем органла дене кылым ышташ полшен, волонтёр пашашке чулымын ушнаш таратен. Санденак тудо ты пашам умбакыже шуяш кӱлмӧ нерген ойлен.
Марий Элым вуйлатышын пресс-службыжын уверже негызеш Ю.ИСАКОВ ямдылен
