Марий предприниматель Николай Мамаевын ешыжын ойгыш логалмыж нерген ВКонтакте соцкыл лаштык гыч веле огыл паледа, очыни. Людмила пелашыже рак чер дене черланен.
Ала экологийна начарештын, ала вес амал, пытартыш жапыште ты чер нигӧм ок чамане, кеч-кӧ декат тӱкалтен кертеш. Ты еш тудын дене ынде 2021 ий гычак кучедалеш. Икымше гана чаракым ыштен кертыныт, Йошкар-Олаште операцийым, химий терапийым эртеныт. Чер чакнаш тӱҥалын улмаш.
Но пытартыш жапыште ӱдырамашым чер угыч шке кепшылышкыже налаш тырша. Кызыт «рецидивиратлыше метастатический ректальный рак» диагонозым шынденыт. Угыч операцийым ышташ кӱлын. Но тидлан Израильыште мумо клиникыште 15 миллион теҥге наре йодыныт. Тыгай оксам еш муын кертын огыл гынат, тушто ӱдырамашым эмлаш келшеныт, операцийымат ыштеныт. Состоянийыжым саемден кертыныт. 10 миллион наре тидлан каен.
Ешлан родо-тукым, йолташ-влак оксам погаш полшеныт. Шкештат мом лиймым ужаленыт. Окса дене полшаш кумылан-влак деке ешын йолташыже Владимир Аптулаев соцкыл лаштыкла гоч лектынак шога. Но тыште тудым титаклыше-шамычат лийыныт. Эсогыл шояклен, шкем пойдараш оксам погат манын, полицийышкат йодмашым возышо-влак лектыныт. Окса ситыдымылан кӧрак Израильысе эмлымвер гыч Людмилалан Российыш, Йошкар-Олаш, пӧртылаш логалын. Эше ик операций деч вара ӱдырамашым мӧҥгыш колтеныт, тетла нимо дене полшен огына керт маныныт…
Израильысе врач дене Людмилам эмлыше Йошкар-Оласе врачын кылже лийын. Ӱдырамашым тыштак йот элысе протокол почеш химий терапийым ышташ тӱҥалыт манын мутланен келшеныт. Но пӧртылмеке, «Дозо пеш кугу, Людмила ок чыте да Российысе норматив дене тыге ышташ огеш лий» манын увертареныт. Угыч Израильысе клиникыш полышым йодын лекташышт логалын. Но тушко каяш адакат окса кӱлын. А Людмила кажне кечын начарештын. Таум ойлат нуно Израильсе клиникылан, тушто Москошто тидым ыштен кертше клиникым муаш сӧреныт. Каласеныт – ыштеныт, чыла документымат мумо клиникыш колтеныт. Кызытеш Людмилан тазалыкше саешт толеш манашыже огеш лий гынат, медик-влакын палемдымышт семын «стабильно неле» – каласыш Владимир Аптулаев телефон дене мутланыме годым. Кызытеш икмыняр химий терапий сеансым ыштеныт. Лишыл жапыште врач-влак Людмилам умбакыже кузе эмлаш тӱҥалме нерген увертарышаш улыт.
Но адакат чыла тидыже оксам шога. Санденак ойгыш логалше марий ешлан полшашак кӱлеш. Кажныже йӧн улмо семын тидым ыштен кертеш. Эсогыл 100 теҥге дене кажне еҥ колта гынат, садак полыш. Ме чылан пырля шуко мом ыштен кертына, тыге огыл мо, йолташ-влак? А пырля вий – кугу вий. Эшежым марий калыкна арам огыл ойла: «Поро паша ӱлыкӧ ок воч».
Людмила Аркадьевна Мамаеван сберкарте дене кылдалтше телефон номерже тыгай: +7-917-718-80-55; Владимир Васильевич Аптулевланат колташ лиеш: номерже – +7-917-704-52-99, сберкарте денак кылдалтын.
С.Носова
