Антиконференций
«Шорвондым» уэш-пачаш тошкымат пайдале
«Марий Эл Республикысе предпринимательствылан полшымо фонд» изи кредит компаний оҥай мероприятийым – «Шорвондо» («Грабли) антиконференцийым – эртарен. Тудо тӱҥалше да вияҥше предприниматель-влаклан ваш-ваш опыт дене палдарыме да шинчымашым пойдарыме верыш савырнен.
Тыгай антиконференций 2019 ийыште ышталтын да эртыше жапыште тунемаш да профессионально кушкаш полшышо кӱлешан платформыш савырнен. Тудо шумо сеҥымаш дене палдараш веле огыл, тыгак шке йоҥылышым лончылаш йӧным пуа, а тидыже бизнес тӱняште пеш кӱлешан. Писын вашталт толшо рынке условийыште предприниматель-влак икте-весын опытшо негызеш тунемыт да тыге шке бизнесыштым вияҥден толыт.
Антиконференцийыш погынышо-влакым республикын промышленность, экономике вияҥмаш да сатулымаш министрже Владимир Халюзин (снимкыште) саламлен да тыгай вашлиймашын регионысо предприниматель экосистемылан пайдале улмыжым палемден. Неле ситуацийыште икте-весе деч тунемме да икте-весылан эҥертыме кугун полшен сеҥат.
Антиконференцийыште спикер-влаклан мут пуалтын. Нуно уста бизнесмен веле огытыл, эше ушан ойым пуэн кертыт. Йол ӱмбаке кузе шогалмыштым, шке брендыштым кузе шочыктымыштым шарналтеныт, бизнесым пайдалын вияҥден толмо шотышто ой-каҥашым пуэныт. Нелылыкым кузе сеҥен толмышт да шонымашке шумышт нерген чон почын каласкалымышт дене молымат у ошкылым ышташ таратеныт.
Тыге «Шорвондо» антиконференций республикысе предприниматель-влакым туныктымо, нунылан полшымо да кумылаҥдыме шотышто шке порысшым умбакыже шуктен толеш. Палемдаш кӱлеш, тыгай поро тӱҥалтыш компаний-влаклан кушкашышт веле огыл, тыгак регионысо чумыр экономикылан вияҥашыже шӱкалтышым ышта.
Юрий ИСАКОВ
Фотом Промэкономсату министерствын да «Мыйын бизнесем» рӱдерын сайтышт гыч налме
