Пудий поснак май-августышто осаллана. Тиде копшаҥге изи, но тазалыклан моткоч лӱдыкшӧ.
Пудий пурлмо але пурымо деч икмыняр ой-каҥашым шотыш налаш кӱлеш:
* чодыраш, шӱгарлаш але эсогыл паркыш тарваныме годым молниян да манжетан курткым чийыза, тувыр мучашым йолаш йымак колтыза, йолаш эҥырашым носки кӧргыш шӱшса. Вуйыш калпакым чийыза але шовычым пидса;
* шкем да икте-весым кажне 2 шагат гыч тергыза;
* копшаҥгым лӱдыктен колтышо средстве дене пайдаланыза.
Пудий могырыш шиждымын пура, утларакше шӱйыш, оҥыш, мӱшкырыш, кутаныш да вожгоклаш пижеш.
Копшаҥгын пурлмыж годым инфекций деч аралалтме икымше йӧн-влак:
- пудийым пинцет дене умшаж гыч пурлмыж тореш чывыштал кучыза да, йырже пӱтыралын, коваште гыч шупшын лукса;
- пурлмо верыш одеколоным, йодым, спиртым але ош аракам йыгалтыза;
- пудийым лукмо деч вара кидым шовын дене сайын мушса;
- пудий энцефалитан манын шонеда гын, копшаҥгым лабораторийыш анализым ыштыкташ наҥгайыза.
Маргарита ИВАНОВА ямдылен.
Роспотребнадзорын фотожо.
