Эртыше арнян республикысе медицине организацийлашке 17 еҥ пудий пурымылан вуйым шийын толын, вес увер дене палдара Роспотребнадзорын Марий Элысе виктемже.
Пудий пурлмо случайым Волжский да Шернур округлаште, Курыкмарий, Звенигово да Медведево районлаште регистрироватлыме.
Эпидсезонышто тыгай азап чӱчкыдынжӧ пӱртӱсыштӧ (45,5%), сад товариществыште, дачысе участкыште да пакчаште (29,8%), сурт-пече коклаште (16,9%), паркыште, скверыште да шӱгарлаште (7,8%) лиеден.
Виктемын специалистше-шамыч шижтарат: республикнан Юл серыштыже верланыше кундемлаште август гыч пудийын кокымшо видше (I. ricinus) чулымештын, тудо йӱштӧ толмеш лӱдыкшым ыштен кертеш. Сандене поснак Волжский да Килемар округлаште, Звенигово да Курыкмарий районлаште илыше-шамычлан тӱткӧ лияш темлалтеш.
Маргарита ИВАНОВА.
Роспотребнадзорын Марий Элысе виктемжын фотожо
