Козьмодемьянскысе пассажир-влаклан причалым августышто, Юл эҥер серыште верланыше олалан 440 ий темме вашеш, чоҥен шуктат.
Козьмодемьянск турист да экскурсант-влакын йӧратыме верышкышт савырнен, причалым чоҥен шуктымаш олалан вияҥашыже кугу шӱкалтышым пуа. У объектым пашаш колтымо дене суткаште 200 утла пассажирым шупшыкташ йӧн лектеш. Тылеч посна, тӱрлӧ кугытан судно-влакат жаплан чарнен кертыт.
Марий Элыште тидын марте капитальный порт сооружений лийынжат огыл. Причалым чоҥымо мероприятий-влакым республикын социально-экономический вияҥмаш индивидуальный программыш пуртымо дене регионлан шийвундо ойыралтын.
Республикын транспорт да корно озанлыкын министрже Александр Герасименко Марий Эл вуйлатыше Юрий Зайцевлан палемдыме пашан кугурак ужашыже шукталтме нерген ойлен. Объект технически велым 75 процентлан ямде.
Пашам олан юбилейжылан мучашлен шуктыман, палемден регион вуйлатыше.
«Ӱшанем, пассажир-влаклан келыштарыме причал турист-влакын чотыштым эшеат шукемда, тидыже гостиничный бизнеслан вияҥашыже, у экскурсий направленийлам ышташ, кочмывер-влакым ешараш корным почеш. Чыла тидыже налогым шукемда, калыкын илышыжым саемда. Моткоч сай, у причал Козьмодемьянскын 440 ийым темыме вашеш тыште илыше-влаклан кугу пӧлек лиеш. Уло кумылын олан пайремышкыже толам, – каласен Юрий Зайцев.
Марий Эл вуйлатыше палемден: Петербургысо тӱнямбал экономический форум кышкарыште кодшо ийын «Туризм. РФ» корпорацийын вуйлатышыже Сергей Суханов дене пашам пырля ыштыме нерген ойпидышым пеҥгыдемдыме. Козьмодемьянскысе причал ты ойпидышыште палемдыме «Центр этнотуризма на Волге» республик кӧргыштӧ да ӧрдыжкӧ лектын коштмо туризм проект (тудо вес регионла гыч турист уна-влакым кумылаҥдымашке виктаралтын) дене келшышын чоҥалтын.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
