Палынем ыле, тений Марий Элыште Россий Федерацийын президентше Владимир Путинын Сеҥымаш кече дене саламлыман открыткыжым мыняр еҥ налын?
А.ГРОМОВ
Волжский район
Йодышлан Россий Федераций Социальный фондын Марий Элысе пӧлкажын пресс-службыштыжо тыге вашештеныт:
– Кугу Отечественный сарын ветеранже-влак ий еда Сеҥымаш кече вашеш элнан президентше В.Путинын саламлымашыжым налыт. Сарын участникше ден тылын труженикше-шамычын спискыштым РФ президентын администрацийышкыже регионысо Социальный фонд ямдылен колта.
Тений В.Путин Сеҥымаш кече дене Марий Элыште илыше 1,8 тӱжем утла ветераным саламлен. Элым вуйлатышын открыткыжым налше-шамыч коклаште эн шукыжо – 1786 еҥ – тылын труженикше-влак улыт, эн шагалже – 29 граждан – Кугу Отечественный сарын участникше ден инвалидше-шамыч. Тиде спискыш тыгак концентрационный лагерьлаште ийготыш шудымо пагытыште лийше 30 узникым, «Жителю блокадного Ленинграда» знак дене палемдалтше 9 еҥым да моло ветераным пуртымо.
Эн шуко ветеран – 731 еҥ – Йошкар-Олаште ила.
Президентын лӱман саламлымашыже правительственныйлан шотлалтеш, тудо кажне ветеранлан кидышкыжак кучыкталтеш.
М.ИВАНОВА
