Бабинмытын кудывечышкышт логалмеке, пийын тыгай чапле пӧртыштӧ илымыжым ужын ӧрмалген колтет да оза-влакын поро шӱм-чонан улмыштым, янлыкым пагалымыштым умылет. Адакше кугыеҥ-шамычын пийым кузе ончымыштым йоча-влакат ужыт да тиде сай койышым шканыштат кӱсынлат – вес семынже лийынжат огеш керт. Теве тыгеракын кугезе апшаткудо ончыкылык тукымым тапта.
Айдемын шке пеленже илаш туныктымо янлык кокла гыч пий эн пайдалылан шотлалтеш. Тудо – ӱшанле йолташ, весела компаньон да сай полышкалыше.
Тӱҥалтыште пийым оролаш, сонарлаш да кӱташ веле туныктеныт гын, кызыт паша радамжым палынак кумдаҥденыт – ынде тудо сокыр еҥымат вӱден коштыкта, черле-шамычымат эмла, полицийыштат служитла, сарыштат кредалеш, утарыме пашаштат участвоватла, грузымат шупшыкта…
Ялыште пий деч посна ик ешат ок иле, очыни. Тыште тудо – тӱҥ сурт орол! Теве Звенигово районысо Кожласола ял гыч 70 ийыш тошкалше пенсионер В.Бабинат ӱмыржӧ мучко гаяк пийым кучен. Но ӱмаште Бакс лӱман шоҥго сурт оролжо илыш гыч каен, да ӱдырамаш пийым тетла ом нал манын шоналтен, вет ынде шкежат тӱҥ шотышто мӧҥгыштак шогылтеш. Но Валентина Ивановнан тыгай шонымашыж дене поснак изирак кум уныкаже йӧршын келшен огытыл: авашт велым Шолэҥер ковашт деке унала мийымышт годым чӱчӱштын сонарыш коштыктымо лайка урлык ава пийжын пинегым ыштымыж нерген пален налыныт да иктыжым мӧҥгыш кондаш сӧрвалаш тӱҥалыныт. Тыге, кум тылзаш эн мотор пинеге Бабинмытын кудывечыштышт илаш тӱҥалын. Путырак чолга улмыжлан йоча-влак тудым Вольт манын лӱмденыт.
Пинегым шинчырленыт да ончычсо сурт оролын пӧртышкыжӧ илаш колтеныт. Но Валентина Ивановнан кугу грузым тора кундемлашке шупшыктышо Эдуард эргыже, мӧҥгыштӧ шуэн лиймыжым, пелашыжын аза дене шинчымыжым, йоча-шамычын школышто кужу жап лиймыштым да аважын йыжыҥже корштымым шотыш налын, эрыкыште кудалышташ йӧратыше изи пийлан эше леведышан, кӱваран да южым колтышо пырдыжан кугурак оралтым чоҥен, янлык пӧртымат тушкак вераҥден (снимкыште). Вольтлан тыгай «сурт-печыште» палынак йӧнан: йӱштыштӧ ок кылме, ночкышто ок нӧрӧ, кечыште ок ыре – узьмак.
Маргарита ИВАНОВА
Авторын фотожо
