«Zа Марий Эл» поро кумылым ончыктымо фондым почмо кечылан пӧлеклалтше торжественный мероприятийыште тудын але марте шуктымо пашажым иктешленыт да ончыкыжым ыштышашым палемденыт. Тушто регион вуйлатыше Юрий Зайцев лийын.
Фонд республик вуйлатышын да Марий Эл правительствын полшымышт дене 2023 ий 15 ноябрьыште ышталтын. Идалык утларак жапыште 17 гуманитар да военно-шефский миссий шукталтын. Тыгодым фондын командыже ты пагытыште СВО кайыме кундемлаште лиеден. Тымарте тушко 5000 тонн утла гуманитар грузым наҥгаеныт.
Торжественный ужаш тӱҥалме деч ончыч Марий Эл вуйлатыше фондын гуманитарный конвойжын специальный сарзе операций кайыме верлашке мийымыж нерген фотовыставкым, маскироватлыше сетке, нашлемник, салтак-влаклан модыш-талисман-влакым ыштыме мастарлык-класслам ончен савырнен.
Мероприятийын участникше-влаклан ойлымыж годым Юрий Зайцев тыге ойлен:
– «Zа Марий Эл» поро кумылым ончыктымо фонд – кызыт тиде боец-влаклан, утарыме кумдыкласе еҥ-шамычлан единый рӱдер. Поснак шефствыш налме Запорожский областьысе Куйбышевский район нерген ойлыман.
Марий Эл вуйлатыше «Zа Марий Эл» фондын вуйлатышыже Роман Золотухинын пашажым палемден. Боецна-влаклан мо кӱлешым наҥгайымашке тудо шкеже чолган ушна. Тыге эртыше кок ий жапыште СВО кайыме кундемыште чылаже 240 утла кечым эртарен.
Юрий Зайцев специальный сарзе операцийын участникше-влаклан да нунын ешыштлан полшымо шотышто республикыште паша кӱлеш семын шукталтеш манын ушештарен.
– Военнослужащий ден лишыл еҥышт-шамыч деч пурышо кажне йодмаш ончалтеш. Чылаже 50 утла тӱрлӧ социальный полыш пуалтеш. Но мемнан геройна-влаклан полышым пуымо шотышто эн кугу пашам «Zа Марий Эл» фонд шукта. Мыйын шонымаште, тудым ыштыме деч вара эртыше икымше идалык гуманитар конвойым чумырымаште, колтымаште да намиен шуктымаште тыршыше-влакым чылаштым иквереш уша. Тиде бизнес еҥ-влак, профсоюз ден мер организаций, федеральный структур да тыглай еҥ-влак улыт, – каласен Марий Эл вуйлатыше.
Республик вуйлатыше «Zа Марий Эл» фондлан Шочмо эл верч тыршымаште у кӱкшытыш шуаш тыланен да наградым кучыктен. Марий Эл Республик вуйлатышын Тауштымашыже «Песни о войне» проект вуйлатышылан, «Zа Марий Эл» фондын волонтёржо Мария Вишневскаялан, «Искусственны коваште завод», «Йошкар-Оласе ТЭЦ-1», «Марий целлюлоз-кагаз комбинат» акционер ушем-влаклан увертаралтын.
– Тау шуктымо пашадалан да азапланымашдалан, тау поро пашам ыштымыдалан, – каласен Юрий Зайцев.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
