3-6 апрельыште республикнан рӱдолаштыже «Йошкар-Олаште – Йоча КиноМай» II кинофорум эртен.
Тудын кышкарыште «Йоча КиноМай» поро кумылым ончыктышо фонд йоча ден подростко-влаклан 14 фильмым ончыктен. Тыгак тӱрлӧ творческий вашлиймаш, профориентаций дене урок, оҥай мастер-класс-шамыч лийыныт.
Кинофорумым 3 апрельыште Яков Эшпай лӱмеш Марий кугыжаныш филармонийыште торжественно почыныт, а тылеч ончыч журналист-влаклан пресс-конференций эртен.
Поснак веселан да пайдалын мастер-класс-влак эртеныт. 4 апрельыште С.Г.Чавайн лӱмеш калыкле книгагудышто актрисе, режиссёр Анна Багмет И.С.Палантай лӱмеш тӱвыра да сымыктыш колледжын студентше ден Медведево районысо Шойбулак ден Семёновко селасе школла гыч тунемше-шамыч дене вашлийын. Нуно Багметын «Memento Vitae» кӱчык метражан фильмым онченыт, тылеч посна режиссёр нуным ик жаплан актёрын рольыштыжо шижаш таратен.
5 апрельыште Национальный сымыктыш гимназийыште продюсер, режиссёр Евгения Муравьёва ден самырык актёр Даниил Муравьёв «Кузе киношко логалаш?» мастер-классым эртареныт. Нуно шкеныштын сеҥымаш историйышт дене палдареныт, карьер кӱкшытыш кайыме корнышто вашлиялтше нелылык нерген каласкаленыт, тыгак актёр пашаште ятыр кӱлешан ой-каҥашым пуэныт.
Российын сулло артистше Сергей Плотников ден киноактёр Нодар Джанелидзе Йошкар-Оласе 7-ше №-ан школышто уна лийыныт. Тушко Кугу Отечественный сарын ветеранже Яков Николаевич Заболоцких миен. Вашлиймаш моткоч поро шӱлышан лийын. Уна-шамыч йоча-влакын йодышыштлан вашештеныт, гитар почеш пырля муралтеныт.
Кинофорум кундемыштына поро йӱлашке пурен, ӱшанена. Кумдан палыме режиссёр ден артист-шамыч эше ятыр пайдале, шонкалаш таратыше, патриот шӱлышан кинофильмлам кондат.
Лидия Шабдарова.
Лидия Шабдарован фотожо.
Снимкыште: Кинофорумым почмо годым.
