Регион-влак кокласе «Марий Мер Каҥаш» мер толкынын
«Марий форум-2022: мер пашам виктарымаште тӱшка увер йӧн дене кыл да увер технологийым кучылтмаш» шошо сессийжын иктешлымашыже (резолюций)
2022-ше ий, ӱярня тылзын 19-ше кечыже
Марий Эл Республик, Йошкар-Ола
1. Сессий палемда: форум ныл регион гыч (Пошкырт, Татарстан, Угарман, Марий Эл) 120 участникым ушен.
- Российын финн-угор тӱняште марий ТУЙ-влак ончыл верыште улыт:
а) прессе (газет, журнал) 16 лектеш, икымше верыште улына, б) Интернет тӱняште марий савыктыш, теле-, радиоканал-шамыч кугу верым айлат, в) марий блогер-влак чолгалыкым ончыктат, г) компьютер лингвист А.Чемышевын командыже, Интернет кумдыкышто цифровой технологийым кучылтын, марий йылмым тӱнямбал кӱшкытыш нӧлта. - Темлымаш-влак:
- Марий Элысе да вес кундемласе йоча тӧнежлаште марий ТУЙ-ым вияҥдаш манын, подпискым ышташ кугыжаныш деч субсидийым йодаш;
• «Марий Эл. Официальный документым савыктыше газетым» савыкташ ешартыш оксам ойыраш манын, Марий Эл виктерыш серыш дене лекташ.
• Марий Элын Тӱвыра, савыктыш да калык-влак паша шотышто министерствыжлан ТУЙ-ышто ыштыше-влаклан шинчымашым нӧлтышӧ семинар-влакым эртараш; - Марий блогер-влак коклаште конкурс-влакым умбакыжат эртарен шогаш;
- Марий Элысе информатизаций да увер-кыл департаментлан чыла организаций-влакын компьютерышкышт марий букван раскладкым шындаш;
• Марий Эл ТВ-н контентшым вес регионлашке шараш манын, лицензийлан
Марий Эл виктер деч шийвундым йодаш;
- ВГТРК-ан Марий Элысе филиалыштыже аралалтше марий калыкын тӱвыра да сымыктыш поянлыкшым – Шӧртньӧ шондыкшым, Шӧртньӧ фондшым – кумда тӱняш лукмо пашам умбакыже шуяш;
- Вуз-влак дене пырля план але программе почеш ТУЙ-лан келшыше специалист-влакым (журналистым, кусарышым, корректорым, дизайнер-верстальщикым, компьютер лингвистым, сайтым вӱдышым, радио- да телевӱдышым) ямдылыме шотышто кутырен келшаш;
• Марий мер ушем-влаклан чыла пашам ыштыше соцсетьлаште шке лаштыкым почаш да тудым эреак чолган вÿдаш;
• Лишыл марий самырык тукым слётым ТУЙ йодыш дене кылдаш;
• «Юнкор» слётым умбакыже шуяш.
