Энергетике озанлык
Поро кумыл паша тӱҥ пашалан полша
Шокшын кӱлешлыкшым утларак раш телым гына шижын налына, умылена. Таклан огыл тудым социально кӱлешан объект-влаклан ситарымаш энергетике озанлыклан ик эн тӱҥлан шотлалтеш, тидын шотыштак – У Торъял посёлкысо «Сантехремонт» ООО-ланат. Ынде латкумшо ий тудо ты пашам шукта.
Шыжым лач тынар ий ончыч тиде организаций пашажым тӱҥалын. Район администраций дене аренде договорым ыштыме деч вара кызытсе оралтыште верланен. Икымше ийын образований отдел деч 9 котельныйым обслуживатлаш налын гын, кокымшо ийын тӱвыра, спорт да туризм отдел деч эше 10 ешаралтын. Школ ден йочасад, тӱвыра пӧрт ден книгагудо-влаклан нуно шокшым пуэныт да кызытат пуат.
– Утларакышт мландышӱйым, шагалракышт газым, а кокытышт эсогыл пум олтен ырыктат. Тидыже теве мо нерген ойла: эше шуко ялышкыже газ миен шуын огыл. Сандене олтымо сезон жаплан мландышӱйым ончылгоч шкенан транспорт дене шупшыктен ямдылена. Ончыч Йошкар-Ола воктенысе Медведево склад гыч кондымо, кызыт – Киров областьысе Яранск гыч. Тушто шулдырак. Акым шотыш налде да аныклыде ок лий. Утларакше мландышӱй дене пайдаланена гын, кочегаржымат шукырак кучаш логалеш. Газ дене ыштымаште ик операторат эскерен шукта, мландышӱйым олтымаште кокыт гыч ныл еҥ марте, а пум олтымаште кокытын смене дене ыштат. Кочегарлан пашашке ялысымак договор почеш олтымо сезон жаплан, шым тылзылан, налына, – каласыш «Сантехремонт» ООО-н директоржо А.Б.Пузырникова.
Алёна Борисовнан ойлымыж почеш, котельный-влак ужак огытыл, сандене эреак эскерен шогаш перна. Лӱмын аварийный бригадым ыштыме, тушко слесарьым, сварщикым, электрикым да инженерым ушымо. Иктаж-могай кӱрылтыш лиеш гын, нуно вигак тӧрлаш кудалыт – йӱдымат, пайрем годымат. Вет йӱштыштӧ кужун от шуйкале: ырыктыше пуч-влак пудешт кертыт. А тыге ынже лий манын, кеҥежымак олтымо сезон деч ончыч олмыктымо тӱҥ сомылым шуктат, начар верым тӧрлат. Олмыктышо, технике дене ыштыше, бухгалтерий пашам шуктышо да вуйлатыше тӱҥ пашаеҥже латшымытын улыт гын, олтымо сезон жапыште чумыр кочегарге шымлу наре погынат. Тынар шуко пашаеҥым кучаш роскотшат изи огыл. Сандене ешартыш услугым кычалашышт да шукташышт перна.
– А тидлан йӧнна уке огыл. Тӱрлӧ техникына уло: кок КамАЗ автомашина, погрузчик, экскаватор, кран-манипулятор. Нунын дене телым У Торъял посёлко кумдыкышто корным лум деч эрыктена, кеҥежым ял уремыште корныш тыгыде кӱм шарен такыртена. Чоҥышо-влаклан посёлкышто физкультурно-тазаҥдыме комплексым нӧлташ, «Водоканал» ден «Жилсервис» предприятий-влаклан канавым пургедаш, энергетик-влаклан электромеҥгыласе лампычкым вашталтылаш, калыклан уремыште пушеҥгым йӧрыкташ, пӧртым нӧлташ, негызлан мландым пургедаш полшена. Чыла тиде паша посна программе почеш, интернет гоч кылым кучен, аукцион гоч сеҥен налын, посна договор дене але кутырен келшен ышталтеш, – ешарыш ты сомылым шуктышо бухгалтер Н.В.Чемоданова.
Надежда Вячеславовна тений ыштыме моло ешартыш паша денат палдарыш. Тыге Какшанмучаш селаште Кугу Отечественный сарыште вуйым пыштыше-влаклан памятник-обелиск да Совет Союз Герой В.Ф.Загайновлан бюст воктене шарныктыш верым тӱзатыме, Кугу Лумарий ялыште сареш вуйым пыштыше-влакланак памятник-обелискым олмыктымо, Часамласола воктенысе шӱгарла кумдыкым шотыш кондымо. Кӱанпамаш ялыште Полевой уремысе пӧрт леведышым олмыктымо, Какшанмучаш села деке илемла кокласе газопровод воктене мланде корным пеҥгыдемдыме, газым шеледен колтымо пункт кумдыкым тӱзатыме.
– Кеҥежым тӱҥ паша шагал улмо годым ешартыш сомылым шуктымына шкенан базынам пеҥгыдемдашат финанс йӧным пуа. Офисна верланыме ты зданийыште ме ончыч изирак кумдыкым веле айленна. Кокымшо пачашыште роно лийын, но вара тудо СПТУ зданийыш кайыш. Ынде ты зданий тӱрыснек мемнан. Кызыт кокымшо пачашаште олмыктымо пашам ыштена. У ий деч ончыч тӧрлен шуктенат, тушко куснена, шонем, – каласыш директор.
Алёна Борисовна ик ият пеле ончыч угыч пашаш лектын, тылеч ончычшо йоча дене шинчен. А вуйлатыме пашам пелашыже Владимир Анатольевич уштарен. Кызыт тудо тӱҥ инженерын сомылжым шукта, директорын тӱҥ эҥертышыже манашат лиеш. Сандене тыште ончыч ылыжше поро йӱла умбакыже шуялт толеш. Верысе калыкын кажне сай тӱҥалтышыжлан, пайрем концертлан, шахматист ден гармонист конкурслан, черкым олмыктымо пашалан, верысе авторын книгажым савыктен лукташ – молан гына полыш ок пуалт! Тений гына тыгай поро кумыл пашалан «Сантехремонт» ООО 100 тӱжем наре теҥгем ойырен. А поро кумыл паша арам ок лий, тудо тӱҥ пашалан ушнен толашыже полша.
Юрий ИСАКОВ
Снимкылаште: директор А.Пузырникова; тӱҥ бухгалтер А.Софронова, бухгалтер Н.Чемоданова, кадр отдел пашаеҥ Т.Калинина; офис зданийын кокымшо пачашыштыже ырыктыше оборудований шындалтеш; сварщик Я.Иванов котёллан регистрым варитлен ямдыла; Чӱксола тӱвыра пӧртысӧ котельныйын операторжо В.Золотов.
Авторын фотожо
